ՀՀ առողջապահության նախարարությունն իր բնույթով նորմատիվ մեթոդոլոգիական կենտրոն է, որը վերահսկող գործառույթների մասով շատ սահմանափակ է: Նման հայտարարությամբ նոյեմբերի 4-ին լրագրողների հետ հանդիպման ժամանակ հանդես եկավ ՀՀ առողջապահության նախարար Լևոն Ալթունյանը: Նրա խոսքով` վերահսկող, քննիչ և պատժիչ գործառույթներ իրականացնում են այլ մարմիններ:
«Այդ առումով պահանջել առողջապահության նախարարությունից, որ նա ցանկացած ոչ ցանկալի ելքով դեպքի վերաբերյալ բոլոր մանրամասնություններն իմանա, ամեն դեպքում, ճիշտ չէ: Ամեն մեկը պետք է զբաղվի իր գործով: Նույնիսկ եթե առողջապահության նախարարը զբաղվում է դրանով, ապա դա հասարակական կարծիք ձևավորելու նպատակով է»,- նշեց առողջապահության նախարարը:
Լևոն Ալթունյանն, անդրադառնալով իր կատարած այն հայտարարությանը, թե ինքը «մեկ-երկու մահացած ծննդկանի դեպքով չի զբաղվում, դրանով զբաղվում է դատավորը», շեշտեց, որ չնայած կա հասրակության զայրույթն առաջացնելու ռիսկը, սակայն, նախարարը, ստանձնելով այդ պաշտոնը, որդեգրել է «Ճշմարտություն, ճշմարտություն և ոչ մի բան բացի ճշմարտությունից» սկզբունքը: Ալթունյանի դիտարկմամբ` ամբողջ աշխարհում բժշկական սխալի հարցը չափազանց սուբյեկտիվ է: Լինում են դեպքեր, երբ բժշկական նորմաներից շեղվելու ելքը դրական է լինում: Նա ցավով նշեց, որ բժշկությունն ինքն իրենով փորձարկումների շարան է:
«Մի քիչ կրքերը հանգստացնելու համար նշեմ, որ մենք ներդնում ենք առողջապահական արձանագրությունները, որոնցից շեղվելը կարող է հանգեցնել բժշկական սխալի: Բժշկական արձանագրությունները բժիշկներին պաշտպանելու գործառույթ ունեն: Բժշկական սխալները դատարանն ու դատաբժշկական փորձաքննությունը կորոշեն, ոչ թե առողջապահության նախարարությունը»,- հավելեց ՀՀ առողջապահության նախարար Լևոն Ալթունյանը:
