ՀՀ սփյուռքի նախարարության Համահայկական ծրագրերի վարչության պետ Ատոմ Մխիթարյանն այսօր լրագրողներին ներկայացրեց «Սփյուռք ամառային դպրոց» ծրագիրը:
Ծրագիրը մեկնարկել է հուլիսի ութին, ընթանում է Ծաղկաձորում՝ հինգ՝ երիտասարդ առաջնորդների, լրագրողների, ազգային երգի և պարի ուսուցման, հայոց լեզվի արագացված դասընթաց, ուսուցիչների վերապատրաստման ուղղություններով: Այս տարի մասնակիցների թիվը մոտ 220 է: Ծրագիրը 2012-ից է գործում: 2011-ին փորձնական իրականացվեց երկու ուղղությամբ՝ երիտասարդ առաջնորդների և լրագրողների ամառային դպրոց: Ատոմ Մխիթարյանի տվյալներով՝ անցյալ տարվա համար երեսուն միլիոն դրամ էր տրամադրված ծրագրին, այս տարի՝ քառասուն միլիոն դրամ:
«Բոլոր հինգ ուղղություններով մասնակիցների թիվն անցյալ տարի 131 էր: 2013-ին կառավարությունը բյուջեում մոտավորապես 30 տոկոս ավելացրեց և ընդգրկեց գերակա ուղղությունների մեջ: Մասնակիցների թիվը յոթանասունից հասցրինք հարյուրի: 2013 թ. ծրագիրն ընդգրկվել է կառավարության ծրագրում՝ որպես գերակա ուղղություններից մեկը»,- ասաց Ատոմ Մխիթարյանը:
220 մասնակիցները 500 դիմողներից են ընտրվել: Հաշվի է առնվել մասնակիցների մոտիվացիան, երաշխավորությունը համայնքի կողմից, աշխարհագրությունը և գենդերային կազմը: Ըստ Ատոմ Մխիթարյանի՝ եթե համայնքներից հինգ-վեց դիմող է եղել՝ ընտրվել է մեկ-երկուսը: Ամենաշատ մասնակիցները հայոց լեզվի արագացված դասընթացներում են ներգրավվել, տևողությունը չորս շաբաթ է, մասնակիցներն ութսուն հոգի են: Ուսուցիչների վերապատրաստման դասընթացի տևողությունը երեք շաբաթ է, մասնակիցները՝ շուրջ հիսուն հոգի: Երիտասարդ առաջնորդների ամառային դասընթացներում ընդգրկված է 42, սփյուռքահայ լրագրողների դասընթացներում՝ 15 հոգի։ Դասընթացների տևողությունը երկու շաբաթ է: Ազգային երգի և պարի խմբավարների դասընթացները տասն օր է՝ մասնակիցների թիվը՝ 26:
«Արդեն ավարտվում է ամառային դպրոցը, և մարդիկ, որ Հայաստան էին եկել հայերեն ոչ մի բառ չիմանալով, հիմա խոսում են հայերեն»,- նշեց Ատոմ Մխիթարյանը:
Մասնակիցների գերակշիռ մասը ԱՊՀ երկրներից է: