Ղրղըզստանում Չինաստանի դեսպանատան մոտ տեղի ունեցած պայթյունի հետևանքով զոհվել է 1, վիրավորվել 2 մարդ: Այս մասին TASS-ի թղթակցին հայտնել են Բիշքեկի ոստիկանության գլխավոր վարչությունից:
Ղրղըզստանի իրավապահ մարմինների նախնական տվյալներով՝ երեքշաբթի, տեղական ժամանակով մոտավորապես առավոտյան ժամը 10-ին (Երևանի ժամանակով՝ 08.00-ին), անհայտ անձը Mitsubishi ավտոմեքենայով փորձել է հարվածել դեսպանատան դարպասներին, որից հետո տեղի է ունեցել պայթյուն: Հանցագործը տեղում մահացել է, վիրավորվել են դեսպանատան անվտանգության 2 աշխատակիցներ:
«Մեքենայի սրահում գտնվող անձը տեղում մահացել է, դեսպանատան դարպասը և ցանկապատը վնասվել են»,- հայտնել են ոստիկանության քաղաքային բաժանմունքում:
Դեպքի վայր են ժամանել ոստիկանության աշխատակիցները, ովքեր պարզում են պայթյունի հանգամանքները:
Ականատեսների վկայությամբ՝ պայթյունն այնքան ուժեղ է եղել, որ լսվել է Բիշքեկի գրեթե բոլոր շրջաններում:
