Բրիտանացի փորձագետները հաշվարկել են մոտավոր շահույթը, որը երկիրը կստանա արքայազն Ուիլյամի և Քեյթ Միդլթոնի առաջնեկի ծննդից հետո: Ինչպես գրում է The Daily Star-ը՝ այդ իրադարձությունից Մեծ Բրիտանիան կստանա մոտ 250 միլիոն ֆունտի շահույթ:
Ինչպես նշել են մանրածախ առևտրի հարցերով մասնագետները, ժամանակավոր աճը սպասվում է հուշանվերների, մանկական ապրանքների, DVD-ների, գրքերի ու ալկոհոլի վաճառքից: Միայն ալկոհոլային խմիչքների վաճառքը կաճի 62 մլն ֆունտով: Բացի այդ, սպասվում է, որ երեխայի ծննդյան առիթով կավելանա երկիր այցելող զբոսաշրջիկների թիվը:
Նախկինում բրիտանական տնտեսությունում նման ակտիվացումներ նկատվել են Ուիլյամի ու Քեյթի հարսանիքի նախօրեին, թագուհու կառավարման 60-ամյակի տոնակատարություններին: Երկրում թողարկվել էին թեմատիկ հուշանվերներ:
Թեև երեխայի ծննդյան հստակ ամսաթիվ չի նշվում, սակայն փոքրիկը կարող է լույս աշխարհ գալ հուլիսի 13-ին կամ 14-ին:
