Նշաններ, շապիկներ և դրամական հավաքներ՝ կուսակցության ոգին բարձրացնելու համար. այսպես է սկսվել Սարկոզիի նոր քաղաքական քարոզարշավը, գրում է La Repubblica թերթում Անաիս Ջինորին:
«Երբ երեկոյան ժամը հինգին Նիկոլա Սարկոզին հայտնվում է Վոժիրար փողոցում (այնտեղ տեղակայված է «Միություն հանուն ժողովրդական շարժման» կուսակցության շտաբ-գրասենյակը), այնտեղ նրան սպասում է երկրպագուների բազմությունը, որը նախկին նախագահին դիմավորում է «Նիկոլա, վերադարձի՛ր» կոչերով: Սա նոր կարգախոս է, որը տպագրված է կուսակցության երիտասարդ անդամների շրջանում տարածված պայուսակների, նշանների և վերնաշապիկների վրա»,- գրում է պարբերականը:
Հոդվածագիրը գրում է, որ քչերն են կասկածում նախկին նախագահի՝ քաղաքականություն վերադառնալու մտադրությանը, իսկ Սարկոզին ո՛չ «այո» է ասում, ո՛չ «ոչ», սակայն Twitter-ի իր էջում գրում է. «Դուք կարող եք հույսներդ ինձ վրա դնել ամեն անգամ, երբ անհրաժեշտություն կառաջանա»:
Պարտություն կրելով 2012 թ. մայիսի ընտրություններում, Սարկոզին հայտարարեց, որ հեռանում է քաղաքականությունից: Ներկայում նախկին նախագահը ստիպված է գործ ունենալ բազմաթիվ դատական հետաքննությունների հետ՝ սկսած կաշառքից, որոնք ստացել է միլիարդատեր Լիլիան Բետանկուրից մինչև ռեկորդային փոխհատուցումը, որը տրամադրվել է ձեռնարկատեր Բեռնար Տապիին: Սարկոզին ներքաշված է նաև Քադաֆիից ստացված ֆինանսական միջոցների և նրա նախագահության օրոք հարցումների վրա չափից շատ գումար ծախսելու գործի հետաքննության մեջ:
Սակայն քաղաքական բեմահարթակ վերադառնալու Սարկոզիի որոշման գլխավոր պատճառը Սահմանադրական խորհրդի որոշումն է, որի համաձայն՝ «Միություն հանուն ժողովրդական շարժման» կուսակցությունը չի ստանա 11 միլիոն եվրոյի փոխհատուցում նախխընտրական քարոզարշավ անցկացնելու համար՝ գրում է հոդվածագիրը:
Սարկոզին դա անվանել է «լուրջ որոշում, որն իր նախադեպը չունի Հինգերորդ Հանրապետության պատմության մեջ»: Ֆրանսուա Օլանդն իր հերթին պատասխանել է Սարկոզիի ռազմատենչ հայտարարություններին՝ ասլով. «Անտեղի է այսօր խոսել առաջիկա նախագահական ընտրությունների մասին այն դեպքում, երբ ֆրանսիացիները տառապում են»:
«Սարկոզիին սպասվում է պայքար հին գվարդիայի և նոր մրցակիցների դեմ՝ նախկին վարչապետներ Ֆրանսուա Ֆիյոն և Ալեն Ժյուպեն, որոնք երկուսն էլ հավանական թեկնածուներ են: վերջին հարցումների համաձայն՝ Սարկոզին կարող է հույսը դնել կուսակցական ակտիվիստների 83 %-ի աջակցության վրա, սակայն ֆրանսիացիների 60 %-ը կնախընտրեին, որպեսզի երիտասարդ «թոշակառուն», որն ընդամենը 58 տարեկան է, իրեն նվիրեր այլ բանի»,- նշվում է հոդվածում:
Համացանցով հավաքվել է ավելի քան 2.5 միլիոն եվրո՝ ի զորակցություն Սարկոզիի կուսակցության. դա ևս մեկ հուսադրող ազդանշան է նախկին նախագահի համար: «Մեր առաջնորդը կրկին մեզ հետ է»,- վանկարկել են ակտիվիստները:
«Եվս մի փոքր համբերություն» ,- եզրափակում է հոդվածագիրը:
