Մերձավոր Արևելքում տեղի ունեցող իրադարձությունները կարող են հակամարտության համաճարակ առաջացնել` ասել է ՀԱՊԿ գլխավոր քարտուղար Նիկոլայ Բորդյուժան RIA Novosti-ի հետ հարցազրույցում: Այն հարցին, թե ինչպիսին են ՀԱՊԿ-ի մոտեցումները կոլեկտիվ անվտանգության ապահովման վերաբերյալ՝ Մերձավոր Արևելքում լարվածության աճի համատեքստում, Բորդյուժան պատասխանել է, որ իրենք ուշադիր հետևում են այնտեղ տեղի ունեցող իրադարձությունների զարգացմանը:
«Հարցը նույնիսկ նրանում չէ, թե յուրաքանչյուր կոնկրետ մերձավորարևելյան պետության հակամարտությունն ինչպես կանդրադառնա ՀԱՊԿ անդամ երկրների անվտանգության վրա: Մեր մտահոգության հիմքում ինքնատիպ «հակամարտության համաճարակի» առաջացումն է, որը կարող է տարածվել աշխարհաքաղաքական տեսանկյունից մի շարք բարդ տարածաշրջաններում»:
Նրա խոսքով՝ արմատականների զինանոցը՝ ահաբեկչական ակցիաներ, զենքի առևտուր, թմրանյութերի տարածում, ուղղված է և´ կառավարության, և´ առանձին մարդկանց դեմ:
«Վերը նշված վտանգները, մեր կանխատեսումներով, ունեն աճի միտում: Այդ իսկ պատճառով շատ կարևոր է այսօր համատեղ արձագանքման մեխանիզմ ունենալ ահաբեկչական և ծայրահեղական սպառնալիքների, բոլոր հնարավոր ճգնաժամային իրավիճակների դեմ, որոնք կարող են առաջանալ մեզ մոտ, այդ թվում և մերձավորարևելյան գործոնի ազդեցությամբ»,- ասել է Բորդյուժան:
ՀԱՊԿ գլխավոր քարտուղարի խոսքով՝ Աֆղանստանը, չնայած այդ երկրում միջազգային կոալիցիայի տևական և մասշտաբային ներկայությանը, շարունակում է մնալ Եվրասիայի ամենացավոտ կետերից մեկը:
«Մեր կանխատեսումը Աֆղանստանում իրադրության զարգացման վերաբերյալ բացասական է: Այն հավանաբար կսրվի՝ կապված միջազգային կոալիցիոն ուժերի դուրսբերման և առաջիկա նախագահական ընտրությունների ընթացքում ներքաղաքական պայքարի ուժեղացման հետ: Չի կարելի հաջող անվանել նաև թմրամաֆիայի դեմ միջազգային հանրության պայքարը: Մեր տվյալներով՝ այսօր Աֆղանստանում ապօրինաբար գործում են ավելի քան 180 թմրակարտելներ և արտադրվում է աշխարհում ափիոնի 94 տոկոսը»,- ասել է Բորդյուժան:
