Կոտայքի մարզի ընդհանուր իրավասության դատարանի Աբովյանի նստավայրում Վաղինակ Մկրտչյանի նախագահությամբ ընթանում է Արմավիրի մարզի Լեռնագոգ գյուղի 36-ամյա բնակիչ Կամո Բունիաթյանի գործի դատավարությունը:
Առաջադրված մեղադրանքի համաձայն՝ 2012 թվականի փետրվարի 1-ին, ժամը 17-ի սահմաններում քննությամբ չպարզված վայրում, իրեն պատկանող ավտոմեքենայի մեջ նախկինում դատված Կամո Բունիաթյանն անձնական փոխհարաբերությունների շուրջ ծագած վիճաբանության ընթացքում դիտավորությամբ, ապօրինաբար կյանքից զրկելու նպատակով իր մոտ եղած դանակով 26 անգամ հարվածել է Մկրտիչ Հովհաննիսյանի իրանի, ձախ բազկի շրջաններին, պատճառել մկանների, սրտապարկի, սրտի, թոքերի, ստոծանու, ենթաստամոքսային գեղձի, կողերի, 4-րդ կրծքային ողի ձախ լայնաձիգ ելունի վնասումներ, ծակած կտրած բազմաթիվ թափանցող ու կույր վերքեր, որոնց հետևանքով Մկրտիչ Հովհաննիսյանը մահացել է:
Բունիաթյանն իր մեքենայով դիակը տեղափոխել է Երևանի «Շահումյան-2» գերեզմանատան 15-րդ հատված ու դիմել է փախուստի:
Կամո Բունիաթյանին մեղադրանք է առաջադրվել դիտավորյալ սպանության համար՝ ՀՀ քրեական օրենսգրքի 104 հոդվածի 1-ին մասով:
