Վրաստանում իրավապահ մարմինները Սամեգրելոյում և Ռաչա-Լեչխումիում ձերբակալել են «գողական աշխարհի» երեք ներկայացուցիչների: Այս մասին հաղորդում է «Նովոստի-Գրուզիա»-ն՝ վկայակոչելով Վրաստանի ՆԳՆ մամլո ծառայությանը:
«Հետաքննությունը պարզել է, որ Բակուր Բ.-ն, Իլյա Ս.-ն և Տորնիկե Ջ.-ն Ճանաչում են, այսպես կոչված, «գողական աշխարհը», հաշիվներ են մաքրել՝ հետևելով այս աշխարհի կանոններին, հրամաններ են ստացել «օրենքով գողերից» և իրենք են անձամբ հրամաններ արձակել «գողական աշխարհի» այլ անդամներին և անձանց, որոնք գտնվել են իրենց ազդեցության տակ»,- ասվում է ՆԳՆ հաղորդագրության մեջ:
Ոստիկանությունում նշել են, որ բոլոր երեք ձերբակալվածները կապ են ունեցել «գողական աշխարհի» ավելի «բարձրաստիճան» ներկայացուցիչների հետ, որոնք գտնվում են արտասահմանում: Հարուցվել է քրեական գործ գողական աշխարհին անդամակցելու հոդվածով:
Նշենք, որ նախօրեին Վրաստանի իրավապահ մարմինները Թբիլիսիում ձերբակալել են «օրենքով գող» Տարիել Պոցխվերիային՝ հայտնի որպես «Տարաս»: Քրեական հեղինակությունը ձերբակալվել է Թբիլիսիի կլինիկաներից մեկում, որտեղ բուժման կուրս է անցել:
ԶԼՄ-ների տվյալներով՝ նա վերջերս է ազատ արձակվել բանտից զանգվածային համաներման շրջանակներում:
