ԵՄ կազմից Մեծ Բրիտանիայի դուրս գալու բրիտանացիների որոշումը նշանավորեց եվրոպական երազանքի վերջը: Այս մասին գրում է The Independent-ը:
Պարբերականը հիշատակում է Բրիտանիայի ԱԳՆ ղեկավար Էդվարդ Գրեյի խոսքերը Առաջին համաշխարհային պատերազմից առաջ. «Ամբողջ Եվրոպայի վրա մարում են կրակները»: Հետևելով հանրաքվեի արդյունքներին՝ հոդվածի հեղինակը եզրակացնում է, որ այդ արտահայտությունը լավագույնս բնորոշում է իրերի ներկայիս վիճակը մայրցամաքում:
Հոդվածագիրը գրում է, որ եվրոպական նախագիծը կրել է ամենանվաստացուցիչ և ջախջախիչ պարտությունը իր 60 տարվա պատմության ընթացքում: ԵՄ անդամ ոչ մի երկիր երբեք չի լքել բլոկը: Եվ խոսքը այնպիսի մեծ պետության մասին է, ինչպիսին Մեծ Բրիտանիան է, որտեղ ապրում է ամբողջ ԵՄ-ի բնակչության 10%-ը, և արտադրվում է բլոկի ՀՆԱ-ի մեկ հինգերորդ մասը:
Հեղինակը կանխատեսում է, որ Բրիտանիան և նրա եվրոպացի հարևանները մտնում են դառը վեճերի և հանդիմանությունների երկարատև շրջան, մինչ Արևմուտքը բախվում է տնտեսության և անվտանգության լուրջ խնդիրների: Այդ վեճերի հետևանքով և՛ Մեծ Բրիտանիան, և՛ մնացած Եվրոպան կթուլանան:
Brexit-ի շոկից հետո եվրոպական մյուս պետությունները կպնդեն, որ ԵՄ-ն կարող է փրկվել և նույնիսկ բարգավաճել առանց Բրիտանիայի: Սակայն հանրաքվեն հաստատ շղթայական ռեակցիայի կհանգեցնի մյուս երկրներում, օրինակ՝ Շվեդիայում, Դանիայում, Նիդերլանդներում և նույնիսկ Ֆրանսիայում:
Հիմա ԵՄ-ում բլոկի ապագայի մասին վեճեր կառաջանան, կարծում է հեղինակը: Ոմանք կոչ կանեն ավելի դաշնային ԵՄ ստեղծել, մյուսները՝ հանդես գալ հօգուտ երկմակարդակ համակարգի:
Վերջում հեղինակը համաձայնում է Մեծ Բրիտանիայի Անկախության կուսակցության ղեկավար Նայջել Ֆարաջի հետ, որ Brexit-ը կարող է ամբողջ եվրոպական նախագծի փլուզման սկիզբ դառնալ:
