Կառավարության երեկվա նիստում որոշվել է Պաշտպանության նախարարության կարիքների համար 2013 թվականի 2-րդ և 3-րդ եռամսյակում 450 տոննա ցեմենտ գնել «Արարատ ցեմենտ»-ից, որը, ինչպես հայտնի է, պատկանում է ԲՀԿ առաջնորդ Գագիկ Ծառուկյանին:
Ըստ ՊՆ ներկայացրած տեղեկանքի` հայտարարված մրցույթի արդյունքներով «Արարատ ցեմենտ»-ի կողմից ներկայացվել է գնային առաջարկ՝ Մ-400 մակնիշի փաթեթավորված ցեմենտի 1 տոննայի արժեքը՝ 52 հազար դրամ, իսկ «Միկա ցեմենտ»-ի կողմից՝ 1 տոննայի արժեքը՝ 53 հազար դրամ:
«Նկատի ունենալով, որ «Արարատ ցեմենտ» ՓԲԸ-ի կողմից ներկայացված գնային առաջարկը համապատասխանում է տվյալ խմբաքանակի համար հաստատված նախահաշվարկային գնին, ինչպես նաև այն հանգամանքը, որ կառավարության 2013 թ. ապրիլի 18-ի N 441-Ն որոշմամբ Մ-400 մակնիշի փաթեթավորված ցեմենտի ձեռք բերման արժեքը սահմանված է 1 տոննան՝ 51 100 դրամ, ինչը փաստացի հնարավոր չէ ապահովել, առաջարկվում է թույլատրել Պաշտպանության նախարարությանը՝ ցեմենտի ձեռք բերումն իրականացնել 52 հազար դրամ չափով»,- ասված է ՊՆ-ի հիմնավորման մեջ:
