Ռուսական իշխանությունները «սառն» են արձագանքել Ռուսաստանի և ԱՄՆ-ի միջուկային զինանոցների հետագա կրճատման վերաբերյալ Բարաք Օբամայի առաջարկին: Այս մասին գրում է The Los Angeles Times-ը: Բեռլինում իր ելույթի ժամանակ ամերիկացի առաջնորդը հայտարարել է, որ կհասնի միջուկային փորձարկումների համապարփակ արգելման մասին պայմանագրի վավերացմանը և նույնն անելու կոչ է ուղղել այլ տերություններին: Բացի այդ, Օբաման հայտնել է, որ կցանկանար Ռուսաստանի հետ բանակցություններ անցկացնել միջուկային զինանոցները 1/3-ով կրճատելու մասին:
Սակայն, ինչպես նշում է պարբերականը, ռուսական կողմն այդ հարցի շուրջ բանակցություններն անվանել է անցյալի արձագանք: Որոշ փորձագետների կարծիքով՝ միջուկային սպառազինության հետագա կրճատումը Ռուսաստանի շահերից չի բխում:
The Wall Street Journal-ը նույն կարծիքին է, և գրում է, որ Օբամայի առաջարկը Ռուսաստանի կտրուկ պատասխանին արժանացավ: Պարբերականը՝ հղում անելով վերլուծաբանների և դիվանագետների կարծիքներին, գրում է, որ միջուկային զենքը ավելի մեծ դեր ունի Ռուսաստանում, քան ԱՄՆ-ում, քանի որ Մոսկվայի սովորական սպառազինության ծավալը զգալիորեն քիչ է, քան Վաշինգտոնինը: Դա է Օբամայի առաջարկներին Ռուսաստանի թերահավատ մոտեցման պատճառը:
The Christian Science Monitor-ի հոդվածագրի կարծիքով՝ ռուսական կողմը իրեն ավելի «խոցելի» է համարում, այդ իսկ պատճառով նրան սպառազինության ավելի մեծ ծավալ է անհրաժեշտ:
