ԱՄՆ-ը հարգում է նախագահական ընտրություններին իրանցի ժողովրդի ընտրությունը, որի արդյունքներով հաղթեց Հասան Ռուհանին, սակայն միևնույն ժամանակ երկրում կան մարդկանց խոսքի և հավաքների ազատության լուրջ սահմանափակումներ: Այս մասին Trend գործակալությանը հայտնել է ԱՄՆ Պետդեպի մամլո քարտուղար Ալան Էյրը:
«Ինչպես հունիսի 17-ին Ռուսաստանի նախագահ Վլադիմիր Պուտինի հետ հանդիպման ժամանակ ասել էր ԱՄՆ նախագահը, Վաշինգտոնը ապագայի հույս ունի, սակայն մտավախություններ կան: Իսկապես, Ռուհանիի հաղթանակը պոտենցիալ հուսադրող նշան է, սակայն մենք պետք է սպասենք հաջորդ քայլերին ու իրադարձություններին»,- ասել է ամերիկացի դիվանագետը:
Հիշեցնենք, որ հունիսի 15-ին կայացած ընտրություններում Ռուհանին ընտրվել էր ձայների 50.7 տոկոսով:
Իր առաջին մամլո ասուլիսի ժամանակ Ռուհանին ասել էր, որ ծրագրում է լավ հարաբերություններ հաստատել բոլոր երկրների հետ: Նա նշել էր, որ Իրանի ու ԱՄՆ-ի կապերը պետք է հիմնված լինեն փոխադարձ հարգանքի վրա, սակայն Իրանի միջուկային իրավունքները պետք է ճանաչվեն:
Էյրի խոսքով՝ նրա հաղթանակը որոշակի հնարավորություն է ընձեռել միջուկային խնդրի լուծման հարցում, և եթե Իրանն օգտվի այդ հնարավորությունից, ԱՄՆ-ը կարող է լավ գործընկեր դառնալ նրա համար:
