Բոլիվիական Razon պարբերականը հրապարակել է նախկինում անհայտ անձնական նամակներ, որոնք պատկանում են կուբացի հեղափոխական Էռնեստո Չե Գևարայի՝ Բոլիվիայի պարտիզանական պատերազմի ժամանակներին: Այս մասին հաղորդում է RIA Novosti-ն:
Նյութերը վերաբերում են այն շրջանին, երբ Չե Գևարան անցած դարի 60-ական թվականներին մի խումբ համախոհների հետ փորձում էր պարտիզանական արշավ սկսել Բոլիվիայի իշխանությունների դեմ: Նրա մահից հետո՝ 1967թ., փաստաթղթերը գտնվել են բոլիվիացի զինվորականների հսկողության տակ:
Խոսքը տեքստի շուրջ 20 էջերի և լուսանկարների մասին է, որոնք լրագրողներին են հանձնել նախկին զինվորականները: Օրինակ՝ լուսանկարներից մեկում պատկերված է գերմանական ծագում ունեցող արգենտինացի Թամարա Բունկեի (մականունը՝ Տանյա) աճյունը: Նա եղել է Չե Գևարայի համակիրներից և սպանվել է մարտերից մեկի ժամանակ: Փաստաթղթերի թվում է նաև Տանյայի նամակը՝ ուղղված իր ընկերոջը, որն այդպես էլ չհասավ հասցեատիրոջը:
Razon-ը պնդում է, որ բոլիվիացի զինվորականների մոտ դեռ կան Չե Գևարայի պարտիզանների շատ նամակներ, որոնք նրանք գրել են արդեն գերեվարված ժամանակ:
