Կործանարար ջրհեղեղը, որը 21 մարդու կյանք է խլել և մեծ վնաս հասցրել Գերմանիային, Չեխիային, Սլովակիային, Հունգարիային, հասել է Բալկանյան տարածաշրջանի երկրներ: Այն գերազանցել է 2006թ.-ի ռեկորդը: Այս մասին հաղորդում է ITAR-TASS-ը:
Ներկայում Խորվաթիայում Դանուբ գետի մակարդակը սկսել է նվազել: Ջրհեղեղի առավելագույն մակարդակը այստեղ եղել է հունիսի 15-16-ի գիշերը, երբ Վուկովար քաղաքի մոտ ջրի մակարդակը հասել է 724 սմ-ի: Իսկ Օսիեկ քաղաքով հոսող Դրավա գետի մակարդակը 500 սմ է, որը մեկ օրվա ընթացքում նվազել է 14 սմ-ով: Փորձագետների կարծիքով՝ այս ցուցանիշները կպահպանվեն առաջիկա 5-7 օրերի ընթացքում:
Սերբիայում այսօր ջրհեղեղը Նովի Սադ քաղաքի մերձակայքում հասել է ամենաբարձր մակարդակին՝ 678 սմ-ի: Ըստ փորձագետների՝ հունիսի 17-ից ջրի մակարդակը կսկսի իջնել: Բեզդան քաղաքում իրավիճակն աստիճանաբար կարգավորվում է. մեկ օրվա ընթացքում ջուրը նվազել է 13 սմ-ով: Ամենամեծ վնասը հասցվել է Բեոչին շրջանին, որտեղ նաև տարհանվել են բնակիչները:
Փրկարար ծառայությունների ուշադրության կենտրոնում է Սերբիայի և Ռումինիայի սահմանում գտնվող «Ջերդափ 1-ին» ՀԷԿ-ը: Փորձագետների կարծիքով՝ օբյեկտը լիովին պատրաստ է դիմակայել ջրին:
Ջրհեղեղ է սպասվում նաև Ռումինիայում: Իշխանությունները վերահսկում են իրավիճակը Պրուտ և Դանուբ գետերում, ստուգում ՀԷԿ-երը:
Բուլղարիայում ևս նախապատրաստական աշխատանքներ են տարվում այս առումով: Շրջակա միջավայրի պահպանության նախարարությունը նախազգուշացրել է ջրի մակարդակի կտրուկ բարձրացման մասին, որը կարող է տեղի ունենալ երկրի հյուսիսային հատվածում գետերի հեղեղման հետևանքով:
