Այն, ինչ կատարվում է Թուրքիայում, կանդրադառնա և՛ Հայաստանի, և՛ տարածաշրջանի, և՛ Թուրքիայի արտաքին քաղաքականության վրա: Այս մասին այսօր լրագրողների հետ հանդիպման ժամանակ ասաց Կովկաս ինստիտուտի տնօրեն, քաղաքագետ Ալեքսանդր Իսկանդարյանը՝ խոսելով արտաքին քաղաքական զարգացումներից:
Բանախոսի կարծիքով, այն, ինչ կատարվում է Թուրքիայում, կանդրադառնա և՛ Հայաստանի, և՛ տարածաշրջանի, և՛ Թուրքիայի արտաքին քաղաքականության վրա: Նրա գնահատմամբ՝ Թուրքիայի վարչապետ Ռեջեփ Թայիփ Էրոդողանը թուլանում է, չի կարողանում վերահսկել իրավիճակը, որի վառ ապացույցը նրա կատաղի դիմադրությունն է ցուցարարներին: Իսկանդարյանի դիտարկումներով՝ թուրք հասարակության ընդվզումն առաջացել է այն պատճառով, որ հոգնել է Էրդողանի հռետորաբանությունից, սոցիալ-տնտեսական դժվարություններից: Քաղաքագետը չասաց, թե կոնկրետ ինչ ազդեցություն կունենան Հայաստանի վրա Թուրքիայում տեղի ունեցող բախումները: Նրա համոզմամբ՝ Էրդողանը հիանալի հռետոր է, նա ռուսական Ժիրինովսկին է՝ Թուրքիայում, սակայն այս անհաջողություններից հետո իշխանությունը կորցրել է կապն իրականության հետ:
Անդրադառնալով Ադրբեջանում կայանալիք ընտրություններին՝ բանախոսն ասաց, որ կհաղթի Ալիևը։ Թեև Ադրբեջանի ընդդիմությունը միավորվում է, սակայն հաղթանակի չի հասնի:
Հարցին, թե Արևմուտքը կպահի՞ Ալիևի նման նախագահին, Իսկանդարյանը պատասխանեց, որ Արևմուտքն ընտրելու մեծ հնարավորություն չունի: «Ադրբեջանը նավթային երկիր է, տրանզիտ երկիր է, կարևոր դիրք է զբաղեցնում: Արևմուտքը Մուբարաք է ընդունել, Քադաֆիի հետ է շփումներ ունեցել, ուստի Ադրբեջանի նման երկրին ամեն ինչ կներվի»,- ասաց նա:
Լուսանկարը՝ PanARMENIAN Photo-ի
