2013-ի գարնանային զորակոչն այսօր մեկնարկեց. մոտ 180-200 նորակոչիկ ստացավ պատվաստում և բժշկական քննություն անցավ: Նորակոչիկները հուզված են, շատերը դեռ երեկվա «բանակի քեֆի» ազդեցության տակ են: «Առաջին լրատվական»-ի հետ զրույցում նրանք հավաստիացրեցին, որ գնում են հանուն հայրենիքի այս երկու տարին անցկացնելու, շուտ ծառայելու և վերադառնալու: «Այս երկու տարին կյանքի փուլ է, որը պետք է հաղթահարել»,- ասաց նորակոչիկներից մեկը:
ՀՀ Զինված ուժերի գլխավոր թերապևտ, գնդապետ Գայանե Ղուկասյանը հայտնեց, որ զինակոչիկների մոտ ամենաշատ հանդիպող խնդիրը ջերմային հակազդեցությունն է նախքան պատվաստումը և դրանից հետո: Ժամը 15:00-ի դրությամբ 70 նորակոչիկների արդեն զննել էին: Հիմնական անհանգստացնող հանգամանքը, ըստ Գայանե Ղուկասյանի, ջերմային ռեակցիան է նախքան պատվաստումը:
Նա նշեց, որ ֆլյուորոգրաֆիկ հետազոտման արդյունքում մեկ նորակոչիկի մոտ կողային գոյացություն է հայտնաբերվել։ Վերջինս կանցնի անհրաժեշտ հետազոտություն, և դեռ չի զորակոչվի:
Նա նշեց, որ պատվաստանյութերը միջազգայնորեն հաստատված, լիցենզավորված են, ԿԿԽ-ն 30-50 %-ի դեպքում կարող է ջերմային ռեակցիա առաջացնել: Դա չի համարվում պատվաստման բացասական հետևանք, պարզապես հետպատվաստումային ջերմային ռեակցիա է, որը կարճատև է: Կա հիվանդասենյակ, որտեղ առողջական վիճակի թեթև խնդիրներ ունեցող զինակոչիկները ժամանակավոր, որքան անհարաժեշտ է, լինում են բժշկի հսկողության տակ: Կա հերթապահ բժիշկ: Եթե անցողիկ հետպատվաստումային ռեակցիներն անցնում են, նորակոչիկի վիճակը նորմալանում է, զորակոչում են զորանոց, եթե ոչ, ապա նրան ՊՆ կենտրոնական հոսպիտալ են տեղափոխում:
ԶՈՒ ԳՇ պետի տեղակալ Լևոն Մնացականյանը չժխտեց, որ այսօր կան անձինք, ովքեր փորձում են օգտվել իրավիճակից և միջնորդ-բինգո հանդիսանալ: Նա նշեց, որ, ցավոք սրտի, զինվորական կոմիսարիատներում էլ կան նման աշխատակիցներ. «Այս պահի դրությամբ Ռազմական ոստիկանության, ԱԱԾ-ի օպերատիվ աշխատանքի արդյունքում հայտնաբերվել են դեպքեր, քննություն է իրականացվում, համոզված եղեք, որ ազատվելու են աշխատանքից, իսկ հետագա ընթացքը կորոշվի իրավապահ մարմիների կողմից անցկացված քննության արդյունքում»:
Լևոն Մնացականյանը նշեց, որ արձանագրվել է երկու դեպք:
