Կանադական Ալբերտի նահանգի իշխանություններն իրականացնում են Ֆորտ Մաքմյուրեյ քաղաքի ամբողջական տարհանում։ 80 հազար բնակչություն ունեցող քաղաքը տարհանվում է՝ կապված հրդեհի զգալի տարածման հետ։ Այս մասին հայտնում է Reuters գործակալությունը՝ հղում անելով տեղի իշխանություններին։
Հրդեհը տարածվում է քաղաքի հարավային մասից։ Սկզբում իշխանությունները մտադիր էին տարհանել քաղաքի ծայրամասերի 7 շրջանների մի քանի հազար բնակչի, ովքեր մոտ էին հրդեհի գոտուն, սակայն այնուհետև որոշում է ընդունվել ամբողջ քաղաքը տարհանելու մասին։
Հրդեհի գրաված տարածքը հասնում է 1800 հեկտարի։ Նահանգի հյուսիս-արևելքում անտառային հրդեհները ոչնչացրել են մի քանի մասնավոր բնակելի տուն։
Կրակը շատ արագ տարածվում է չոր եղանակի և ուժեղ քամու պատճառով։ Ֆորտ-Մաքմյուրեյի շրջանում հրդեհաշիջման աշխատանքներում ներգրավված է 80 հրշեջ։ Գործի է դրվել ավիացիան։ Տարերային աղետի գոտում փակ են շատ ավտոճանապարհներ։ Վառվող անտառների բոցը տեսանելի է մի քանի տասնյակ կիլոմետրից։
