Սիրիայի ոչ թռիչքային գոտու հավանական ստեղծումը ԱՄՆ-ին շատ ավելի թանկ կարժենա, քան համանման գործողությունը Լիբիայում, իսկ դրա գործողության գոտին սահմանափակելու դեպքում այն չի կարող կանխել ընդդիմության պարտությունը: Այս մասին RIA Novosti գործակալությանը հայտնել է Վաշինգտոնի Մերձավոր Արևելք ինստիտուտի փորձագետ, ԱՄՆ Պետդեպարտամենտի Մերձավոր Արևելքում և Հարավային Ասիայում հետախուզության գրասենյակի տնօրենի նախկին տեղակալ Ուեյն Ուայթը:
Ուայթի խոսքով ՝ Սիրիայում ոչ թռիչքային գոտի սահմանելը մեծ խնդիր կդառնա ԱՄՆ-ի համար, քանի որ շատ ուժեր և միջոցներ զբաղված են Աֆղանստանում:
«Այն կպահանջեր շատ ավելին, քան պահանջվեց Լիբիայում ոչ թռիչքային գոտի ստեղծելիս, քանի որ լիբիական ՀՀՊ-ն սիրիականից բավականին թույլ է: Եթե, այսպես կոչված, ոչ թռիչքային գոտին ներառեր հարձակումներ կառավարական զորքերի և «Հըզբոլլահ» շարժման ուժերի վրա, այդ հավելյալ խնդիրը կապահովեր ավելի շատ ավիացիա, վառելիք և զինամթերք»,- ասել է նա:
Նրա խոսքով՝ Սիրիայում ամբողջական ոչ թռիչքային գոտի սահմանելը քիչ հավանական է: Փորձագետն ավելի հավանական է համարում սահմանափակ գոտի ստեղծելը՝ երկրի հյուսիսը պաշտպանելու նպատակով՝ որպես ապաստարան ընդդիմության համար:
«Նման սահմանափակ ոչ թռիչքային գոտի ստեղծելու արժեքն ամեն դեպքում էական կլինի: Դրա հետ մեկտեղ այն հավանական է՝ չկանխի ապստամբների հավանական պարտությունը մնացած շրջաններում»,- նշել է գործակալության զրուցակիցը:
Նման իրավիճակում ԱՄՆ-ում Բարաք Օբամայի վարչակազմը կենթարկվի ավելի սուր քննադատության այն բանի համար, որ բավականաչափ չի աջակցում ընդդիմությանը:
