Ծանրամարտի Հայաստանի տղամարդկանց հավաքականի անդամ, պատանեկան Օլիմպիական խաղերի չեմպիոն, Եվրոպայի առաջնության բրոնզե մեդալակիր Սիմոն Մարտիրոսյանը գոհ չէ Եվրոպայի առաջնությունում իր գրանցած արդյունքներից:
«Առաջին անգամն է, որ մասնակցում էի մեծահասակների Եվրոպայի առաջնությանը, և ինձ հաջողվեց մեդալակիր դառնալ: Իհարկե, արդյունքներից գոհ չեմ, քանի որ մարզումների ժամանակ ես ավելի շատ կիլոգրամներ եմ բարձրացնում: Այստեղ էլ ակնհայտ է, որ կարող եմ ավելին անել: Պոկում վարժությունում 185 կգ պարզապես գցեցի: Հրումում ես կարող էի ավելին անել: Ինչ որ բան չստացվեց: Իհարկե գոհ չեմ ինքս ինձնից: Ինքս վստահ էի, և թեթևություն էլ զգում էի: Օլիմպիական խաղերի համար ավեի մեծ աշխատանք է պետք կատարել: Վստահաբար, Ռիոյի Օլիմպիական խաղերում ավելի բարձր քաշեր կբարձրացնեմ»,- ՀԱՕԿ լրատվականի հետ զրույցում ասել է հայ ծանրորդը:
Պոկում վարժության առաջին մոտեցման ժամանակ Մարտիրոսյանը բարձրացրեց 182 կգ: Սակայն հաջորդ երկու մոտեցումների ժամանակ Մարտիրսյանը գխավերևում չպահեց 184 կգ և185 կգ: Պոկում վարժությունում պատանեկան Օլիմպիական խաղերի չեմպիոնը նվաճեց արծաթե մեդալ: Հրում վարժությունում Մարտիրոսյանը նախ բարձրացրեց 215 կգ, այնուհետև՝ 220 կգ, բայց չհանեց 225 կգ: Հրում վարժությունում նա գրավեց 3-րդ տեղը, իսկ երկամարտի 402 կգ արդյունքով դարձավ Եվրոպայի առաջնության բրոնզե մեդալակիր:
