Իսրայելի փոխարտգործնախարար Զեև Էլկինը պաղեստինա-իսրայելական խաղաղ բանակցությունների վերսկսման համար գլխավոր խոչընդոտ է անվանել պաղեստինցիների մոտ պահպանվող հավատը միակողմանի միջոցառումների ուղով ուզածին հասնելու հնարավորության հանդեպ: Որպես միակողմանի միջոցառումների օրինակ նա նշել է ՄԱԿ-ի Գլխավոր ասամբլեայում նրանց պետականության ճանաչումը: Այս մասին հայտնում է RIA Novosti-ն:
Էլկինը նշել է, որ Իսրայելը հետաքրքրված է երկխոսության վերսկսմամբ և պատրաստ է առանց նախապայմանների վերջ դնել երկամյա դադարին ցանկացած օր, ցանկացած ժամի և ցանկացած վայրում՝ լինի դա Երուսաղեմում, Ռամալլայում, Պեկինում, Նյու Յորքում, Մոսկվայում, ցանկացած տեղ:
«Գլխավոր խնդիրը երկկողմ բանակցությունների գնալու պաղեստինցիների վախն է, քանի որ երկկողմ բանակցություններում ոչ միայն ստանում ես, այլև պետք է ինչ-որ բան զիջես»: Նրա խոսքով՝ իրողությունը չի կարելի միակողմանիորեն փոխել, չի կարելի ստեղծել իրական պաղեստինյան պետություն միակողմանի ճանապարհով:
Նա քննադատել է միջազգային հանրությանը ՄԱԿ-ի Գլխավոր ասամբլեայում պաղեստինցիների դիմումին աջակցելու համար, որի հաջողությունը, ինչպես կարծում է փոխնախարարը, ամրապնդել է դեպի անկախություն շարժվելու և Իսրայելի հետ բանակցությունները շրջանցելով սեփական պետության ստեղծման հեռանկարի վերաբերյալ նրանց համոզվածությունը:
