Այսօր Սուեզի ջրանցքի միջոցով Եգիպտոսի զինված ուժերը մի քանի տասնյակ տանկեր և այլ ծանր ռազմական տեխնիկա են ուղարկել Սինայի թերակղզու հյուսիս: Այս մասին հայտնում է RIA Novosti-ն՝ հղում անելով տեղի ԶԼՄ-ներին:
Սպասվում է, որ այդ ռազմական տեխնիկան առաջիկա ժամերին կհասնի Շեյխ Զուայդ շրջան, որտեղ, ենթադրաբար, թաքնվում են հինգշաբթի եգիպտացի 7 ոստիկանի ու զինվորի առևանգած զինվորականները:
Հայտնի է, որ դեռևս երեկ երեկոյան այդ շրջանին հարակից Ալ-Արիշ ավան են ժամանել բանակային հատուկջոկատայինների ու ահաբեկչության դեմ պայքարի գծով մասնագետների երեք խմբեր: Ներկայում բանակն արգելափակել է բոլոր հարակից ճանապարհները, շրջանի գլխավերևում ռազմական ինքնաթիռներ են պտտվում:
Գրոհայինները առևանգել էին 3 եգիպտացի ոստիկանների ու 4 զինծառայողների՝ իրենց ձերբակալված ընկերների հետ փոխանակելու համար: Եգիպտոսի իշխանությունների տվյալներով՝ երկրի հատուկ ծառայություններին հաջողվել է պարզել առևանգողների անունները:
Կիրակի Youtube-ում հայտնվել էր տեսանյութ, որում կապկպված աչքերով 7 մարդիկ Եգիպտոսի նախագահ Մուհամմադ Մուրսիին խնդրում էին ազատել իրենց՝ բաց թողնելով ձերբակալված գրոհայիններին: Մուրսին երեկ հայտարարել էր, որ ուժայիններին առևանգողների հետ չեն բանակցի:
