Անդրիաս Ղուկասյանը հնարավորության դեպքում մինչև տարեվերջ կհիմնադրի Սոցիալ-դեմոկրատական նոր կուսակցություն: Այսօր լրագրողների հետ հանդիպման ժամանակ այս մասին ասաց ՀՀ նախագահի նախկին թեկնածու, քաղաքագետ, իրավաբան Անդրիաս Ղուկասյանը՝ անդրադառնալով իր հետագա ծրագրերին:
Բանախոսը նշեց, որ ներկայումս երկրում ըմբոստության տարբեր օջախները խոսում են այն մասին, որ հանրության մեջ լարվածությունը կրիտիկականի է հասնում, որը կարող է բերել բախումների: Նրա համոզմամբ՝ ընդդիմության շրջանում նոր քաղաքական ուժերի ձևավորման անհրաժեշտություն կա:
«Ես ինքս սոցիալ-դեմոկրատական հայացքների եմ հարում, գտնում եմ, որ այդ ուժի բացակայությունը կա, աշխատավոր մարդու շահերը պաշտպանված չեն, գտնում եմ, որ այդ բացն անհրաժեշտ է լրացնել»,- ասաց նա:
Հարցին՝ պատրաստվո՞ւմ է նոր ուժ հիմնել, պատասխանեց, որ ենթադրում է, որ մինչև այս տարվա վերջ կստեղծվեն նոր կուսակցություն հիմնադրելու հնարավորություններ, քանի որ կեղծ կուսակցական համակարգն իր դարն ապրել է, կուսակցությունները շարունակաբար ցուցաբերում են իրենց անկարողությունը:
«Ունենք կեղծ ընդդիմության խնդիր: Դրանք այն բոլոր ուժերն են, որոնք սատարել են շինծու ընտրությունների կայացմանը: Կուսակցաշինության ոլորտում նոր մոտեցումներ են պետք, պետք է նոր մրցունակ ուժեր ստեղծել, առանց ժողովրդավարական սկզբունքների չենք կարող հաջողության հասնել:
Միավորման թեման սպառված է: Մեր երկրում համակարգային փոփոխությունները կարող են իրականանալ, եթե ձևավորվի քաղաքացիական շարժում նման նպատակով: Դա պետք է լինի քաղաքացիական ֆորմատ, բայց երկիրը կառավարելու համար կուսակցություններ են անհրաժեշտ, որպեսզի քաղաքական դաշտ ձևավորվի: Անհրաժեշտ են նոր տեսակի կուսակցություններ, որոնք իրենց ներսում կունենան ժողովրդավարական մեխանիզմներ և թափանցիկ կլինեն հանրության համար»,- եզրափակեց իր խոսքն Անդրիաս Ղուկասյանը:
