1910թ. այս օրը Սարուխան գյուղում (այժմ` Գեղարքունիքի մարզում) ծնվեց գրականագետ, բանասիրական գիտությունների դոկտոր, ԽՍՀՄ գրողների միության անդամ Անուշավան Մակարյանը։
Միջնակարգ դպրոցն ավարտել է 1930-ին։ 1930-1933թթ. աշխատել է որպես ուսուցիչ։ 1938-ին ավարտել է Երևանի պետական համալսարանի բանասիրական ֆակուլտետը, ապա սովորել ասպիրանտուրայում։ Մասնակցել է Հայրենական մեծ պատերազմին։
1944-ին «Մ. Նալբանդյանի պոեզիան» թեմայով ատենախոսություն է պաշտպանել և ստացել բանասիրական գիտությունների թեկնածուի աստիճան։ 1968-ին «Երվանդ Օտյան» թեմայով դիսերտացիա է պաշտպանել և ստացել բանասիրական գիտությունների դոկտորի աստիճան։
1944-1947թթ. աշխատել է ՀԽՍՀ Մ.Աբեղյանի անվան գրականության ինստիտուտում, 1971-1973-ին` արվեստի ինստիտուտում։ Միաժամանակ, 1969-1973թթ. աշխատել է Կիրովականի (այժմ՝ Վանաձոր) հեռակա մանկավարժական ինստիտուտում։ 1972-1973-ին եղել է նույն ինստիտուտի հայ գրականության ամբիոնի վարիչը։
Ռուսերեն լույս է տեսել նրա «Երգիծանքի մասին» (Մոսկվա, 1967) գիրքը։
Մահացել է 1973թ. դեկտեմբերի 1-ին Կիրովականում, թաղվել է Երևանում։
