ԱԺ արտահերթ նիստին «ՀՀ կառավարության կառուցվածքի մասին» ՀՀ օրենքում լրացում և փոփոխություն կատարելու մասին նախագծի քննարկմանը ՀԱԿ խմբակցության պատգամավոր Նիկոլ Փաշինյանը հայտարարեց, թե ելույթը կառուցողական կլինի, որպեսզի ՀՅԴ-ի և ՀՀԿ-ի տոնը չփչացնի:
«ՀՀԿ-ն ու ՀՅԴ-ն որոշել են համագործակցել և այս կոնտեքստում դաշնակցական Լոքյանին նշանակել Տարածքային կառավարման նախարար, որին ժողովուրդը սպասում է «վաղուց և սրտատրոփ»: Տարածքային կառավարման նախարարությունը փակվեց մեկ տարի երեք ամիս առաջ և միացվեց Արտակարգ իրավիճակներին, որովհետև, ըստ նրա, ՀՀ Տարածքային կառավարման նախկին նախարար Արմեն Գևորգյանից հարմար թեկնածու չգտնվեց:
Հիմա միավորում են, քանի որ հազարավոր առաջարկություններ են եղել ընտրողներից, ովքեր պահանջում են առանձնացնել ՏԿ նախարարությունն ԱԻ նախարարությունից և հիմա ժողովրդի պահանջը ի կատար է ածվում:
Սրանով հնարավորություն է տրվում ոչ միայն Լոքյանին նշանակել, այլ չազատել Արմեն Երիցյանին իր պաշտոնից. սա չափազանց կարևոր է: Մինչդեռ մյուս նախարարներն ազատվելու են, ինչը չափազանց անթույլատրելի և ոչ կառուցողական մոտեցում է: Ինչու «գեղեցիկ ավանդույթ»-ով չբաժանել նախարարությունները, ինչպես օրինակ՝ դարձնել Կրթության և առանձին Լուսավորության նախարարություն, և Լուսավորության նախարար նշանակել Աշոտյանին, իսկ Կրթության նախարար՝ Լևոն Մկրտչյանին…
Ասում են մի քանի մարզ նույնպես տրվելու են Դաշնակցությանը: Երկու գյոզալ մարզպետ զոհաբերվելու են քաղաքական կոնյուկտուրայում: Բայց կարելի է կիսել նաև մարզերը, թող լինի Արագածի մարզ և առանձին Ոտնի-ի մարզ, թող լինի առանձին Գեղարի մարզ և առանձին՝ Ունիքի մարզ: Իսկ թե կիսված մարզերի, որ մասում ՀՀԿ մարզպետ կնշանակվի, որում դաշնակցական, սա արդեն կարծում եմ սուգուբա-ՀՀԿ-ՀՅԴ ներկուսակցական հարաբերությունների հարց է»,- Նիկոլ Փաշինյանը եզրափակեց սարկազմով հագեցած իր ելույթը:
Մանրամասները՝ տեսանությում:
