Նախագահական ընտրություններից հետո «Ժառանգություն» կուսակցության առաջնորդ, նախագահական ընտրություններում պաշտոնական տվյալներով երկրորդ տեղը զբաղեցրած Րաֆֆի Հովհաննիսյանին օգնելու համար Հայաստան էր ժամանել Լևոն Բաղրամյանը, ով, ըստ որոշ տեղեկությունների, մարշալ Բաղրամյանի թոռն է:
Լևոն Բաղրամյանն սովորել և ապրում է ԱՄՆ-ում, աշխատում է ԱՄՆ Սենատում, ինչպես նաև մասնակցել էր Օբամայի քարոզարշավին՝ որպես փորձագետ։ Նա Րաֆֆի Հովհաննիսյանի ավագ որդու՝ Կարինի մտերիմ ընկերն է:
Հայաստան ժամանելուց հետո Բաղրամյանը համակարգում էր Հովհաննիսյանի՝ Ազատության հրապարակում ընթացող ասուլիսները, քաղաքացիական ֆորումները, ինչպես նաև՝ Րաֆֆի Հովհաննիսյանի կողքին եղավ հացադուլի բոլոր 21 օրերի ընթացքում:
Ի դեպ, նախքան ընտրությունները որոշ տեղեկությունների համաձայն՝ Բաղրամյանին առաջարկել էին դառնալ Րաֆֆի Հովհաննիսյանի շտաբի պետ, սակայն վեջինս այդ ժամանակ իր համաձայնությունը չէր տվել:
Այսօր, ահա, Լոս Անջելեսի նրա ազգականները «Առաջին լրատվական»-ին տեղեկացրեցին, որ իրականում նա ոչ մի կապ չունի մարշալ Բաղրամյանի հետ։ Լևոն Բաղրամյանի ընտանիքը Պարսկաստանից է, իսկ Հովհաննես Բաղրամյանը՝ Դաշտային Ղարաբաղի Չարդախլու գյուղից:
