«Հայոց համազգային շարժում» հասարակական կազմակերպությունն այսօր հայտարարություն էր տարածել, որում Ալեքսանդր Արզումանյանը, Կարապետ Ռուբինյանը, Հովհաննես Իգիթյանը, Արարատ Զուրաբյանը որակվել էին որպես «մի խումբ մարդիկ», ովքեր խախտում են կուսակցությունների մասին օրենքը՝ քանի որ առանց ՀՀՇ ՀԿ-ի համաձայնության իրավունք չունեն օգտագործել «Հայոց համազգային շարժում» անվանումը:
Հայտարարության մեջ մասնավորապես ասված է. «Հայոց համազգային շարժում» (ՀՀՇ) անվանումը եւ ՀՀՇ-ի խորհրդանշանը պատկանում են տվյալ անվամբ հասարակական կազմակերպությանը եւ գրանցված են Հայաստանի Հանրապետության իրավաբանական անձանց պետական ռեգիստրի կենտրոնական մարմնի կողմից այս տարվա մարտի 13-ին, գրանցման համար` 211.171.760952: Այդ մասին հայտարարում է հիշյալ հասարակական կազմակերպությունը այսօրվա հաղորդագրությունում` անդրադառնալով նախօրեին «մի խումբ մարդկանց» հրավիրած ասուլիսին:
Նշելով, որ հիշյալ միջոցառման մասին հրապարակումներում «զանգվածային լրատվության որոշ միջոցներ օգտագործել են «ՀՀՇ» անվանումը եւ ՀՀՇ խորհրդանշանը», «Հայոց համազգային շարժում» հասարակական կազմակերպությունը պնդում է, որ առանց իր համաձայնության «ՀՀՇ» անվանումը եւ ՀՀՇ խորհրդանշանը օգտագործելը համարվում է «Կուսակցությունների մասին» եւ «Հասարակական կազմակերպությունների մասին» օրենքների խախտում:
«Ուստի, խնդրում ենք զանգվածային լրատվության բոլոր միջոցներին իրենց հրապարակումներում եւ հաղորդագրություններում «ՀՀՇ» անվանումը եւ ՀՀՇ խորհրդանշանը օգտագործել միմիայն «ՀՀՇ» հ/կ-ի պաշտոնական հաղորդագրություններն ու հայտարարությունները հրապարակելիս կամ «ՀՀՇ» հ/կ-ի գործունեությանն առնչվող տեղեկատվություն տարածելիս», – ասված է կազմակերպության նախագահ Վահագն Հայոցյանի ստորագրած հաղորդագրությունում:
Այս կապակցությամբ «Առաջին լրատվական»-ը մեկնաբանություն խնդրեց ՀՀՇ նախաձեռնող խմբի անդամ Հովհաննես Իգիթյանից, ով նախ նշեց, որ հայտարարության մեջ որևէ քաղաքական ենթատեքստ չի տեսնում՝ հավելելով, որ սա, ինչ-որ կազմակերպչական բնույթի հայտարարություն է. «Մենք լուրջ քաղաքական գործիչներ ենք, որևէ գործընթաց սկսելուց առաջ ուսումնասիրել ենք օրենսդրությունը, նկատի առեք նաև, որ մենք օրենսդիր մարմնում աշխատանքի մեծ փորձ ունենք՝ սա առաջինը: Երկրորդը՝ խոսքը չի գնում «մի խումբ մարդկանց» մասին այլ արդարադատության նախարարություն ներկայացնող նախաձեռնող խմբի մասին, որը կարելի է հանգիստ կոչել ՀՀՇ-ի՝ «Հայոց համազգային շարժում» կուսակցության գրանցման նախաձեռնող խումբ. այն իրավաբանական տերմին է, որին մենք հետևում ենք»:
