Ինչպես արդեն տեղեկացրել ենք, «Շախտյոր»-ի կիսապաշտպան Հենրիխ Մխիթարյանը թարմացրել է Ուկրաինայի առաջնությունների արդյունավետության ռեկորդը, որը մինչ այժմ պատկանում էր Սերգեյ Ռեբրովին, ով 22 գոլ էր հեղինակել և 1997/98 թվականների մրցաշրջանի լավագույն ռմբարկու դարձել:
«Տավրիա»-ի դեմ խաղում Հենրիխը երկու գոլ խփեց` 23-րդը և 24-րդն ընթացիկ մրցաշրջանում: Հենրիխի հեղինակած առաջին գոլից վեց րոպե անց կրկին հնչեց Արամ Խաչատրյանի «Սուսերով պարը», որի ներքո հայ ֆուտբոլիստը սովորաբար նշում է իր գոլերը. Հենրիխն իրացրեց 11 մետրանոցը, որն ինքն էլ վաստակել էր:
«Ես ցանկանում էի ռեկորդ սահմանել խաղի ընթացքում խփած գոլերի արդյունքում: Զգում էի, որ կարող եմ: Սակայն մեր մարզիչն ասել էր, որ ես պետք է իրացնեմ 11 մետրանոցները: Փառք Աստծո, չխախտեցի ինքս ինձ տված երդումը և կատարեցի մարզչիս հրահանգը»,- ժպտալով հայտնում է Մխիթարյանը:
«Երեք տարի առաջ, երբ հանդես էի գալիս «Մետալուրգ»-ում, հենց «Տավրիա»-ն խանգարեց նվաճել առաջին տիտղոսը Ուկրաինայի առաջնությունում: Այժմ ես խփեցի ռեկորդային գոլերս հենց այդ թիմի դարպասը»,- եզրափակել է իր խոսքը հայ կիսապաշտպանը:
