Սպիտակ տունը կապ չունի իշխանությունների կողմից Associated Press գործակալության լրագրողների զանգերի մասին տվյալների ստացման հետ: RIA Novosti-ի փոխանցմամբ՝ այս մասին հայտարարել է ԱՄՆ վարչակազմի պաշտոնական ներկայացուցիչ Ջեյ Քարնին:
ԱՄՆ-ում խոշորագույն լրատվական գործակալությունը՝ Associated Press-ը, երկուշաբթի բողոք է հայտնել ընդդեմ երկրի իշխանությունների գործողությունների: Իշխանություններին հասանելի են գործակալության լրագրողների զանգերի մասին տվյալները: Արդարադատության նախարարությունը գաղտնի ստացել է 2012-ի ապրիլ-մայիս ամիսներին ավելի քան 20 հեռախոսագծերի ելքային զանգերի մասին տվյալների պատճեն: Այդ գծերով կարող էին աշխատել ավելի քան 100 լրագրողներ:
«ԶԼՄ-ներում հայտնված տեղեկություններից բացի՝ մենք տվյալներ չունենք АP-ի զանգերի մասին տեղեկություններ ստանալու արդարադատության նախարարության փորձերի մասին: Մենք կապ չունենք այն որոշումների հետ, որոնք ընդունվում են քրեական հետաքննությունների առնչությամբ. դա արդարադատության նախարարության գործն է»,- ասել է Քարնին՝ հավելելով, որ հարցերը պետք է հասցեագրել հենց նախարարությանը:
Ինչպես ավելի վաղ տեղեկացրել էինք՝ ԱՄՆ իշխանությունները չեն հայտնել, թե ինչ հիմունքներով են ցանկացել ստանալ այդ տվյալները, սակայն գործակալությունը կասկածում է, որ խոսքը 2012-ի մայիսի 7-ի տեղեկատվության վերաբերյալ հետաքննության մասին է: Այդ ժամանակ գործակալությունը ներկայացրել էր Եմենում ԿՀՎ-ի օպերացիայից մանրամասներ: Այդ քայլը քննադատվել էր ԿՀՎ-ի ղեկավար Ջոն Բրեննանի կողմից:
