Արմավիրի մարզի ընդհանուր իրավասության դատարանի Էջմիածնի նստավայրում Վահե Խալաթյանի նախագահությամբ ընթանում է Ժորա Խաչատրյանի գործի դատավարությունը:
27-ամյա Ժորա Խաչատրյանը մեղադրվում է հետևյալ արարքի համար: 2012 թվականի հոկտեմբերի 17-ին «Պլազա Լյուքս» հյուրանոցային համալիրում մարմնավաճառուհի Մարինեի ծառայություններից օգտվելու համար Խաչատրյանը վճարել է 25 հազար դրամ: Այնուհետև ինչ-ինչ պատճառներով նա պահանջել է, որ Մարինեն վերադարձնի տրված գումարը:
Չկարողանալով մարմնավաճառուհու հետ համաձայնության գալ՝ Ժորա Խաչատրյանը առավոտյան ժամը 6-ն անց 20 րոպեի սահմաններում Մարինեի ընկերուհի Հռիփսիմեի «Օպել» ավտոմեքենայի բանալիները վերցրել ու, առանց հափշտակելու նպատակի, մեքենան վարելով հեռացել է՝ հայտարարելով, թե մեքենան կվերադարձնի, երբ Մարինեն կվերադարձնի իր գումարը:
Նույն օրը, ժամը 15-ի սահմաններում Ժորա Խաչատրյանը հիշյալ ավտոմեքենան թողել է Երևան քաղաքի Շիրազի փողոցում՝ այդ մասին հեռախոսազանգով հայտնելով մեքենատեր Հռիփսիմեին:
Նմանատիպ պարտադրանքով մարմնավաճառուհուց իր գումարը հետ ստանալու փորձը երիտասարդը կատարել է հախուռն, առանց հետևանքների մասին մտածելու:
Նրան՝ Ժորա Խաչատրյանին, մեղադրանք է առաջադրվել այն բանի համար, որ նա ինքնակամ իրականացրել է օրենքով կամ այլ նորմատիվ իրավական ակտով սահմանված կարգի խախտմամբ իր իրական կամ ենթադրյալ իրավունքները՝ ՀՀ քրեական օրենսգրքի 322 հոդվածի 1-ին մասով:
Ժորա Խաչատրյանի նկատմամբ խափանման միջոց է ընտրված ստորագրությունը չհեռանալու մասին:
