Ազատամարտիկ, «Տիգրան Մեծ» գնդի հրամանատար, ազատամարտիկ Վլադիմիր Առաքելյանի պաշտպան Արայիկ Ալվանդյանը հերքում է, թե Առաքելյանը ցուցմունք է տվել և խոստովանել, որ երկու ավտոմատ է վաճառել հանցավոր խմբի անդամներին։
«Սուտ է, չկա այդպիսի բան»,- «Առաջին լրատվական»-ի հետ զրույցում ասաց Ալվանդյանը։
Փաստաբանը հերքեց նաև տեղեկությունը, թե իր պաշտպանյալը ցուցմունք է տվել։ Ալվանդյանի խոսքով՝ Առաքելյանը ձերբակալման օրվանից առայսօր որևէ քննչական գործողության չի մասնակցել և չի ընդունում իրեն առաջադրված մեղադրանքը։
«Առաքելյանը առայսօր ոչ մի ցուցմունք չի տվել։ Ինքը ձերբակալման օրը հայտարարել է, որ կապ չունի հանցախմբի հետ, և հրաժարվել է որևէ ցուցմունք տալ»,- ասաց փաստաբանը՝ հավելելով, որ Վլադիմիր Առաքելյանի առողջական վիճակը վատացել է, քանի որ վերջինս մի շարք առողջական խնդիրներ է ունեցել։
Նշենք, որ ազատամարտիկները, «Ազատամարտիկների դաշինք»-ի անդամները նույնպես բացառում են, որ Առաքելյանը կարող էր որևէ կապ ունենալ հանցախմբի հետ, լուրջ վերաբերեր նրանց ծրագրերին և դեռ մի բան էլ՝ զենք վաճառեր նրանց։
«Ոչ մի ազատամարտիկ՝ երբեք, ինչ վիճակում էլ լինի, իր երկրի, պետության դեմ որևէ քայլ չի կարող անել։ Ազատամարտիկը դուրս չի գա իր երկրի դեմ, որի համար արյուն է թափել»,- միաբերան պնդում են Վլադիմիր Առաքելյանի ընկերները։
Հիշեցնենք, որ Վլադիմիր Առաքելյանը ձերբակալվեց հունվարի 14-ին՝ «Հայրենիք և պատիվ» կուսակցության ղեկավար Գառնիկ Մարգարյանի հետ։ Առաքելյանին մեղադրանք է առաջադրվել զինված խմբի հետ համագործակցելու, զենք պահելու-իրացնելու մեջ։ Առաքելյանից բացի՝ այս գործի շրջանակներում կա ևս 4 կալանավորված ազատամարտիկ, որոնցից ոչ ոք չի ընդունում իրեն առաջադրված մեղադրանքը։
Հիշեցնենք նաև, որ նախօրեին փոփոխվեց զինված հանցախմբի 6 անդամների խափանման միջոց կալանքը։ Այս պահին ազատության մեջ են արդեն Նելլի Մինասյանը, լրագրող Լիլիթ Թորոսյանը, Սրբուհի Այվազյանը, հանցախմբի ղեկավար համարվող Արթուր Վարդանյանի հորեղբոր որդիները՝ Հայկ և Հրանտ Վարդանյանները, և Հանրային հեռուստաընկերության աշխատակից Արման Հայրապետյանը։ Առաջիկայում ակնկալվում են նոր ազատ արձակումներ։
