Իրանի պետական գործիչներից 5-ը, ովքեր իրենց թեկնածությունն են առաջադրում հունիսի 14-ին կայանալիք նախագահական ընտրություններում, այսօր մասնակցության հայտ են ներկայացրել: Այս մասին հաղորդում է Ria Novosti-ն:
Թեկնածուների պաշտոնական գրանցումը սկսվել է երեքշաբթի օրը և կշարունակվի մինչև մայիսի 11-ը: Այն ամեն օր՝ 5 օրերի ընթացքում, տեղի կունենա Թեհրանում՝ ներքին գործերի նախարարությունում՝ժամը 8:00-18-00-ը:
Ներկայումս հայտ են ներկայացրել Իրանի ազգային անվտանգության գերագույն խորհրդի նախկին քարտուղար և միջուկային ծրագրի շուրջ «վեցնյակի» հետ նախկինում բանակցություններ վարող Հասան Ռոուհանին, գիտական հարցրերով Իրանի փոխնախագահ Սադեք Վաեզադեն, առողջապահության նախկին նախարար Քամրանբաքեր Լանքարանին, Իրանի բնակֆոնդի և քաղաքաշինության նախկին նախարար Մոհամմադ Սայիդիքիան և Մեջլիսի (խորհրդարան) պատգամավոր Մուստաֆա Կավաքեբյանը:
Գրանցումից հետո թեկնածությունները կքննարկվեն դիտորդական խորհրդի կողմից:
Համաձայն Իրանի սահմանադրության՝ նախագահի թեկնածուն պետք է համապատասխանի հետևյալ պահանջներին՝ ունենա Իրանի քաղաքացիություն և իրանական ծագում, ունենա կազմակերպչական ունակություններ, նա պետք է նաև լավ կենսագրություն ունենա, աստվածապաշտ լինի, կատարի Իրանի Իսլամական Հանրապետության պահանջները և հետևի երկրի պաշտոնական կրոնի օրենքներին:
