Հունահռոմեական ոճի ըմբշամարտի Հայաստանի հավաքականը հունվարի 13-ից ուսումնամարզական հավաք է սկսել Երևանի «Հավաքականների մարզումային կենտրոնում»: Այն կտևի մինչև հունվարի 28-ը, որտեղից էլ հավաքականի հիմնական կորիզը կմեկնի Բուլղարիա՝ մասնակցելու հունվարի 28-31-ը Սոֆիայում կայանալիք Դան Կոլով և Նիկոլա Պետրով ամենամյա միջազգային մրցաշարին:
Բուլղարիայի մայրաքաղաքում Հայաստանը կներկայացնեն Ռոման Ամոյանը, Գևորգ Ղարիբյանը, Նարեկ Խաչատրյանը (59 կգ), Միհրան Հարությունյանը (71 կգ), Կարապետ Չալյանը (75 կգ), Արթուր Շահինյանը, Մաքսիմ Մանուկյանը (85 կգ), Արթուր Ալեքսանյանը (98 կգ) և Էդգար Խաչատրյանը (130 կգ): Հավաքականի գլխավոր մարզչին Սոֆիայում կօգնեն Էդուարդ Սահակյանն ու Սամվել Գևորգյանը, իսկ Գևորգ Ալեքսանյանը Հայաստանը կներկայացնի որպես մրցավար:
Լևոն Ջուլֆալակյանը Հայաստանի ըմբշամարտի ֆեդերացիայի մամլո ծառայության հետ զրույցում նշել է, որ նույն ժամանակահատվածում Արսեն և Արամ Ջուլֆալակյանները Արամ Գասպարյանի գլխավորությամբ Ստամբուլում կմասնակցեն ևս մեկ ուժեղ մրցաշարի: Իսկ թե ինչու է այսպիսի որոշում կայացվել, հավաքականի գլխավոր մարզիչն ասել է.
«Օլիմպիական վարկանիշային մրցաշարերից մեկն անցկացվելու է Ստամբուլում: Եվ քանի որ այս մրցաշարին պատրաստվում եմ մասնակցել Արսենի հիմնական մրցակիցները, ուստի նպատակահարմար գտանք նրան ուղարկել Թուրքիա, որպեսզի և՛ ծանոթ լինի մարզադահլիճում տիրող մթնոլորտին, և զգա իր մոտակա մրցակիցների ներուժը: Արամ Ջուլֆալակյանն էլ նրան օգնելու է մարզումային գործընթացում»:
Իսկ ահա Սոֆիայում 59 կգ և 85 կգ քաշային կարգերում համապատասխանաբար երեք և երկու ըմբիշով մասնակցությունը հիմնականում պայմանավորված է այդ քաշային կարգերում առաջատարներին որոշելու համար: Միհրան Հարությունյանն էլ 66 կգ-ի փոխարեն կմասնակցի 71 կգ քաշային կարգում, քանի որ կարիք չկա ավելորդ անգամ քաշ գցել: Հիշեցնենք, որ հայ ըմբիշների համար այս տարվա գլխավոր ստուգատեսը Ռիոյում կայանալիք Օլիմպիական խաղերն են:
