ՀՀ կրթության, գիտության, մշակույթի և սպորտի նախարարության աջակցությամբ հունիսի 9-30-ը Վաղարշապատում անցկացվում է Էջմիածնի «Փոքրիկ քայլ» երաժիշտ-կատարողների միջազգային 7-րդ մրցույթ-փառատոնը։ Այս մասին տեղեկացնում են ԿԳՄՍՆ-ից:
Փառատոնի հիմնադիրներն են Վաղարշապատի համայնքապետարանը և «Արտպրոգրես» մշակութային հասարակական կազմակերպությունը։
14 անվանակարգերում անցկացվող մրցույթ-փառատոնի շրջանակում՝ «Էստրադային երգ» անվանակարգի լսումներին ներկա էր ՀՀ կրթության, գիտության, մշակույթի և սպորտի նախարարի տեղակալ Դանիել Դանիելյանը: Վաղարշապատ համայնքապետարանի «Մակար Եկմալյանի անվան թիվ 1 երաժշտական դպրոցում լսումներից առաջ նախարարի տեղակալը զրուցել է մասնակից երեխաների հետ, քաջալերել նրանց, այնուհետև հետևել ընթացող աշխատանքներին:
Ողջունելով ներկաներին՝ Դանիել Դանիելյանը նշել է, որ «Փոքրիկ քայլ» երաժիշտ-կատարողների միջազգային մրցույթ-փառատոնի անցկացումը լիովին համապատասխանում է ԿԳՄՍ նախարարության՝ գեղարվեստական կրթության ոլորտի պետական քաղաքականությանը: Հատկանշական է, որ այն համարվում է մանկապատանեկան ոլորտի ամենամեծ մրցույթ-փառատոնը, քանի որ ներգրավված են բոլոր մարզերի և համայնքների երաժշտական և արվեստի դպրոցների ավելի քան 1500 աշակերտներ: Այս տարի փառատոնին մասնակցում են նաև Ամերիկայի Միացյալ Նահանգների և Ռուսաստանի Դաշնության ուսումնական հաստատությունների սաներ:
«Սիրելի մասնակիցներ, երաժիշտ-կատարողների միջազգային այս մրցույթը հնարավորություն է տալիս ներկայացնելու ձեր կատարողական արվեստը, բացահայտելու ձեր ներուժն ու հնարավորությունները, ծանոթանալու մյուս մարզերի, համայնքների, դպրոցների ձեր հասակակիցների հետ, սովորելու, զարգացնելու ձեր կատարողական և բեմական կարողությունները: Այս մրցույթը ոչ թե մրցակցության, այլ միմյանց հետ համեմատվելու, բացթողումները լրացնելու, միմյանցից սովորելու և օգնելու հրաշալի հարթակ է: Ձեր մասնակցությունն այս մրցույթին արդեն իսկ համարձակ քայլ է՝ կատարելագործման և զարգացման հրաշալի ուղի, որը չպետք է մնա միայն այս մրցույթի շրջանակում, այլ պետք է ունենա կատարելագործվելու և նոր փորձառության շարունակական ընթացք: Նախորդ տարվա մրցույթ-փառատոնի մասնակիցներից շատերը հնարավորություն են ունեցել մասնակցելու պետական տարբեր միջոցառումների, դրսևորվել նաև այլ բեմերում և համերգային ծրագրերում: Այս մրցույթում անշուշտ կլինեն հաղթողներ, սակայն պարտվողներ չեն լինելու: Եղեք ավելի նախաձեռնող և ստեղծագործ, շարունակաբար աշխատեք ձեր շնորհների կատարելագործման ուղղությամբ, ներկայացեք տարբեր բեմերում և հարթակներում»,- դիմելով երեխաներին ասել է Դանիել Դանիելյանը՝ մաղթելով հաջողություններ և նպատակների իրականացում:
Նախարարի տեղակալը բարձր է գնահատել ժյուրիի աշխատանքը՝ նշելով, որ գնահատող հանձնախմբում ներգրավված են պետական երաժշտախմբերի, Երևանի Կոմիտասի անվան պետական կոնսերվատորիայի, ուսումնական տարբեր հաստատությունների դասախոսներ, արվեստի և երաժշտության ոլորտի ականավոր գործիչներ:
Դանիել Դանիելյանը շնորհակալություն է հայտնել նաև մասնակից երեխաներին, նրանց ծնողներին, մանկավարժներին, փառատոնի կազմակերպիչ «Արտպրոգրես» մշակութային հասարակական կազմակերպությանը՝ կատարած համատեղ աշխատանքի համար:
«Արտպրոգրես» մշակութային հասարակական կազմակերպության նախագահ Արտյոմ Հարությունյանը ևս հաջողություններ է մաղթել աշակերտներին և նշել. «Աշակերտից դեպի երաժիշտ տանող ճանապարհին թող լինեն բացառապես այնպիսի խոչընդոտներ, որոնց լուծումները կգտնեք ձեր ամենօրյա աշխատանքում: Շնորհակալ եմ համատեղ մեծ աշխատանքի համար՝ ծնողներին, մանկավարժներին, և իհարկե ժյուրիի կազմին»:
«Էստրադային երգ» անվանակարգից հետո փառատոնը կշարունակվի «Լարային» և «Փողային» նվագարանների անվանակարգերի լսումներով։ Մինչ այդ անցկացվել են նաև «Դաշնամուր», «Ակադեմիական երգ», «Ժողովրդական նվագարաններ» և այլ անվանակարգերի լսումները։ Հունիսի 29-ին «Ժողովրդական երգ» անվանակարգով փառատոնի լսումների փուլը կավարտվի։
