ԱՄՆ նախագահ Դոնալդ Թրամփը կտրուկ հերքել է ԶԼՄ-ներում շրջանառվող այն տեղեկությունները, թե Իրանը Հորմուզի նեղուցով անցնող նավերից որևէ տուրք կամ ապահովագրական վճար է գանձում։
Սոցցանցերում հրապարակված իր ուղերձում ԱՄՆ նախագահը հստակեցրել է, որ Իրանի իշխանությունները հավաստիացրել են՝ հավելյալ վճարներ չեն պահանջելու և չեն գանձելու։
«Իրանն ԱՄՆ-ին տեղեկացրել է, որ, չնայած կեղծ լուրերին, որևէ վճար չի պահանջում Հորմուզի նեղուցով անցնող նավերի համար։ Եթե սա ճիշտ չէ, բանակցություններն անմիջապես կավարտվեն։ Բացի այդ, ԱՄՆ-ն Իրանին որևէ գումար չի տրամադրել»,- գրել է նա։
Միաժամանակ ԱՄՆ նախագահը հերքել է Իրանին գումարներ փոխանցելու կամ դրա սառեցված ակտիվներն ազատելու մասին լուրերը։ Նրա խոսքով՝ ԱՄՆ-ի վերահսկողության տակ գտնվող իրանական միջոցները կուղղվեն ամերիկացի ֆերմերներին՝ եգիպտացորենի, ցորենի և սոյայի գնման համար, որոնք հետագայում, իբրև մարդասիրական օգնություն, կուղարկվեն պարենի խիստ կարիք ունեցող Իրան։
