27-ամյա էքսկուրսավար Քրիս Բրաութոնը հաճախ էր զբոսաշրջիկներին Զամբեզի գետով հիանալու ուղեկցում: Երկար տարիներ աշխատելով այդ վայրում՝ նա մանրամասն ուսումնասիրել էր տեղի բուսական ու կենդանական աշխարհը, նույնիսկ սովորել էր խուսափել այնտեղի մշտական բնակչից՝ գետաձիուց:
Մի անգամ 3 զբոսաշրջիկների հետ նավակով զբոսնելիս զբոսաշրջիկներից մեկը՝ Էվանսը, նավակից ընկել է գետը: Երբ Քրիսը ձեռքը մեկնել է նրան օգնելու, զգացել է, որ մթության մեջ է հայտնվել:
«Ես կարծես խուլ ու համր էի դարձել: Ես զգում էի, որ իմ ոտքերը ջրի մեջ են, սակայն մարմնիս վերին հատվածը չոր էր: Թվում էր՝ ես մի թակարդի մեջ եմ, որտեղ նեխած ձվի հոտ է փչում»,- հիշում է Քրիսը:
Հասկանալով, որ գտնվում է գետաձիու երախում՝ էքսկուրսավարը մի կերպ փախել է: Նա մի քանի անգամ փորձել է մոտենալ ափին, սակայն հրեշը նրան կրկին ջրի հատակ է քաշել:
Վերջին անգամ, երբ գետաձին կիսով չափ կուլ է տվել Քրիսին, հանկարծ անսպասելիորեն ջրի հատակից վեր է բարձրացել և նրան նետել մի կողմ:
Այստեղ արդեն օգնության են հասել ընկերները: Քրիսի մեջքին այնպիսի մի վերք է եղել, որ նույնիսկ թոքերն են երևացել։ Ընկերներից Մայքը դադարեցրել է արյունահոսությունը՝ փրկելով նրա կյանքը:
Բժշկական միջամտության շնորհիվ Քրիսի կյանքին այժմ վտանգ չի սպառնում:
