Վարշավայի և Մյունխենի համալսարանների կենսաբանական գիտությունների պրոֆեսոր Կարեն Եմենջյանի կարծիքով՝ հայերը պասիվ են, ավելի շատ սիրում են բողոքել, քան կտրուկ քայլերի դիմել: Նա, հայերին համեմատելով եվրոպացիների հետ, ասաց, որ մենք ավելի հարմարվող ենք: Եթե Եվրոպայում ինչ-որ բանի գինը թանկանում է, մարդիկ դուրս են գալիս փողոց և բողոքում են, իսկ մենք դրա փոխարեն՝ հավաքվում ենք Ազատության հրապարակում:
«Մերոնք պայքարելու փոխարեն՝ Օպերայի հրապարակում հոգևոր մազոխիզմով են զբաղվում: Մարդիկ հիմնականում բացասաբար են վերաբերվում պետությանը, իսկ ինչքան վատ մտածես, այնքան շրջապատում կշատանա վատ էներգիան»,- այսօր բանավեճի ընթացքում ասաց նա:
Հոգեբան Միքայել Մադաթյանն էլ հավելեց, որ մենք դեռևս չունենք հասարակություն, և անընդհատ կառավարություն փոխելով՝ հարցը չի լուծվի. «Մենք մեր պետականությունը կորցրել ենք այն ժամանակ, երբ Եվրոպայում քաղաքներ էին ձևավորվում: Եվ այդ շրջանի բացակայության պայմաններում հիմա մեր մտածելակերպը գավառական է: Մենք չունենք նաև կուսակցություններ: Բոլորն էլ ուզում են հզոր հայրենիք, բայց չունեն ծրագիր, չգիտեն ինչպես հասնել դրան»:
Իսկ թե ինչու են մարդիկ արտագաղթում, հոգեբանի կարծիքով՝ դա հայի մտածելակերպ է, գնում են այնտեղ, որտեղ լավ է. «Պետք է մեկ անգամ գիտակցել, թե որտեղ են մեր թերությունները, և անկախ կուսակցական պատկանելությունից՝ պետք է ընտրել այն մարդուն, ով կաշխատի պետության, քաղաքի համար»:
