Ռուս միլիարդատեր Ալիշեր Ուսմանովը վերջերս ձեռք է բերել 100 մլն դոլարի ամերիկյան Apple ընկերության բաժնետոմսեր՝ ակնկալելով դրանց ակտիվ աճ: Այս մասին հայտնել է Ուսմանովն անձամբ՝ փոխանցում է Bloomberg գործակալությունը:
«Ես հավատում եմ այդ ընկերության հաջողությանը նույնիսկ Սթիվ Ջոբսի մահից հետո: Երբ ընկերությունը կորցրել է 100 միլիարդ դոլար շուկայական արժեքից, նրա բաժնետոմսերը գնելու ժամանակն է, քանի որ կապիտալիզացիան կարող է վերադառնալ նախկին մակարդակի»,- հայտարարել է Ուսմանովը գործակալության հետ հարցազրույցում: Գործարարը չի հստակեցրել, թե կոնկրետ երբ է ձեռք բերել բաժնետոմսերը:
Երեկ Nasdaq բորսայում Apple-ի մեկ բաժնետոմս արժեցել է 430.12 դոլար:
«Ոչինչ հավերժ չէ: Սակայն ես կարծում եմ, որ առաջիկա երեք տարիներին Apple-ում ներդրումները շատ խոստումնալից են, հատկապես եթե հաշվի առնենք շահաբաժինների խոշոր վճարումներն ու բաժնետոմսերի հետգնումը»,- նշել է Ուսմանովը, որը Bloomberg-ի տվյալներով՝ աշխարհի հարուստների շարքում զբաղեցնում է 35-րդ տեղը՝ 19.8 մլրդ դոլար կարողությամբ:
Միլիարդատերը նշել է նաև, որ հավատում է բարձր տեխնոլոգիաների ոլորտին և միանգամային վստահ է Facebook-ի ապագայի հարցում:
