Վրաստանի մայրաքաղաք Թբիլիսիում երեկ կայացել է Հարավային Կովկասի երկրներում ամերիկյան դեսպանների հանդիպումը, որը դարձել է ավանդական:
Թբիլիսիում դեսպանները հանդիպել են նաև ԱՄՆ պետքարտուղարի Եվրոպայի և Եվրասիայի գծով տեղակալի օգնական Թինա Քեյդենաուի հետ:
Հանդիպման ժամանակ քննարկվել է տարածաշրջանին և առանձին երկրների առնչվող խնդիրներ:
Կովկաս ինստիտուտի ղեկավար Ալեքսանդր Իսկանդարյանի խոսքերով, նման հանդիպումները շատ նորմալ են և անհրաժեշտ Միացյալ Նահանգների համար:
«Սա Հարավային Կովկասում գործունեության համաձայնեցում է, քանզի Հարավային Կովկասը 2008-ից կտրուկ փոխվել է, և աշխատել Հայաստանում, Վրաստանում և Ադրբեջանում՝ նշանակում է աշխատել տարբեր աշխարհներում: Հարավային Կովկասը մեկ միասնություն է, երբ Օկլահոմայից ես նայում, իսկ մենք բոլորս շատ լավ պատկերացնում ենք, թե ինչքան տարբեր են այդ պետությունները»,- «Առաջին լրատվական»-ի հետ զրույցում ընդգծեց Իսկանդարյանը:
Քաղաքագետի խոսքերով, որպեսզի Միացյալ Նահանգները կարողանա կոորդինացնել իր գործունեությունը Հարավային Կովկասում, դեսպանները պետք է անընդհատ հանդիպեն:
