Մեծ Բրիտանիայի վարչապետ Դևիդ Քեմերոնը մտահոգություն է հայտնել Դուբայում ձերբակալված 3 բրիտանացիների կտտանքների մասին լուրերի կապակցությամբ:
Քեմերոնը հայտարարել է նաև, որ ձերբակալվածների հարցը կբարձրացնի այս շաբաթ ԱՄԷ-ի նախագահի հետ հանդիպմանը՝ հաղորդում է BBC-ն:
Ավելի վաղ իրավապաշտպան Reprieve կազմակերպությունը հայտարարել էր, որ բրիտանացիների դեմ մեղադրանքները պետք է հանվեն կտտանքների մասին լուրերի պատճառով:
Ակնկալվում է, որ Սունիտ Ջիրուի, Գրենտ Քեմերոնի ու Կարլ Ուիլյամսի դատավճիռները կհրապարակվեն այսօր: Նրանց մեղադրում են թմրանյութեր պահելու, օգտագործելու ու տարածելու մեջ: Վերջիններս հերքում են մեղադրանքները:
Գրենտ Քեմերոնի մոր խոսքով՝ իրավապահ մարմինների աշխատակիցները ձերբակալվածներին կտտանքների են ենթարկել էլեկտրական հոսանքով ու նրանց նկատմամբ հրեշավոր գործողություններ են կիրառել:
Դուբայի ոստիկանությունը հերքում է մեղադրանքները:
Բրիտանացիները ձերբակալվել էին օգոստոսին Դուբայում հանգստանալիս, ինչից հետո ոստիկանությունը նրանց ավտոմեքենայում հայտնաբերել էր սփայս տեսակի թմրանյութ:
