Քիչ առաջ Երևանի Ավան վարչական շրջանում «Բարգավաճ Հայաստան» խմբակցության պատգամավորներ Վարդան Օսկանյանը, Նաիրա Զոհրաբյանն ու Էլինար Վարդանյանը նախընտրական հանդիպում ունեցան համայնքի բնակիչների հետ: Նաիրա Զոհրաբյանը նշեց, թե ինչի դեմ է սկսելու պայքարել ԲՀԿ-ն, եթե բնակիչներից ստանա քվե ու ստանձնի քաղաքային տնտեսությունը: Նա հորդորեց հավատալ, թե սկսելու են Երևանից: Նաիրա Զոհրաբյանը հարևանությամբ գտնվող Երևանի քաղաքապետի Հանրապետական թեկնածուի շտաբի մոտ հավաքված անձանց, ովքեր հետևում էին ԲՀԿ-ի հանդիպմանը, խոսք ուղղեց՝ ասելով, թե իրենք թշնամիներ չեն, թող գան-միանան և լսեն իրենց ելույթները:
Նրա խոսքը լրացրեց ԲՀԿ-ական պատգամավոր Էլինար Վարդանյանն, ով ասաց, թե քաղաքի ասֆալտապատումը և այլ աշխատանքները ողորմություն չէ, ինչպես գործող իշխանությունը ներկայացնում է. «Այդ աշխատանքները նրանց պարտականությունն են, որոնք չպետք է ներկայացվեն բնակիչներին, ասես իրենք ողորմել են»:
Խոսեց նաև Վարդան Օսկանյանը, ով սկսեց տնտեսությունից և նրանից, որ տնտեսությունը 2008 թ. այս կողմ որևէ փոփոխություն չի կրել: Ըստ նրա` ՀՆԱ-ն չի պակասել, մնացել է նույնը, բայց մյուս բոլոր ցուցանիշներով Հայաստանը հետընթաց է ապրել, ուստի ինքը վստահեցնում է, որ օգտագործելով հենց առաջին հնարավորությունը, այսինքն Երևանի ավագանու ընտրությունները՝ ԲՀԿ-ն, հավատարիմ մնալով իր կարգախոսին, սկսելու է Երևանից, որում փոփոխությունները շատ կարևոր են, քանի որ Երևանի քաղաքապետ լինել նշանակում է լինել վարչապետ և կառավարել փոքրիկ մի Հայաստան՝ իր առանձին տնտեսությամբ և այլ բոլոր ոլորտներով: Ավանի բնակիչներին Վարդան Օսկանյանը ներկայացրեց նաև քաղաքի կառավարման իր մոտեցումները:
Մանրամասներին առաջարկում ենք ծանոթանալ տեսանյութի միջոցով:
