Ամերիկյան վարչակազմը, որը զենքի շրջանառության նկատմամբ վերահսկողության խստացման մասին օրինագծերի քննարկման ժամանակ բախվել է հանրապետականների դիմակայությանը, ամերիկացիներին կոչ է արել բարեփոխումներին աջակցություն հայտնել համացանցի միջոցով, այդ թվում՝ Twitter ու Facebook ցանցերի:
Այս առնչությամբ ԱՄՆ նախագահ Բարաք Օբաման ուրբաթ առաջին անգամ ազգին հղվող ամենաշաբաթյա ուղերձի իրավունքը զիջել է Նյութաունի (Կոնեկտիկուտ նահանգ) բնակչուհի Ֆրենսիս Ուիլերին, որը 6-ամյա որդուն կորցրել է տարրական դպրոցում տեղի ունեցած ողբերգության ժամանակ (հրաձգությունը խլել էր 20 երեխայի և 6 մեծահասակի կյանք): Այս մասին հայտնում է RIA Novosti-ն:
«Օգնե´ք մեզ անել ինչ-որ բան, քանի դեռ մեր ողբերգությունը չի վերածվել Ձեր ողբերգության… Հանուն երեխայի, որը երբեք տուն չի վերադառնա… Մենք պետք է համոզենք Սենատին միասին գործել և իրականացնել խելամիտ բարեփոխում զենքի շրջանառության ոլորտում»,- ասել է Ուիլերը՝ չկարողանալով զսպել արցունքները:
Նրա խոսքով՝ ցանկացողները կարող են դիմել իրենց սենատորին կամ Սպիտակ տան կայքում աջակցություն հայտնել նախագահին:
Հիշեցնենք, որ ԱՄՆ Սենատն ապրիլի 11-ին կողմ է քվեարկել զենքի վաճառքի վերահսկման խստացման օրինագծի վերաբերյալ դեբատների մեկնարկին: