ՌԴ նախագահին կից մարդու իրավունքների պաշտպանության աշխատանքային խումբը Hermitage հիմնադրամի իրավաբանի գործը համարել է շինծու: Այս մասին գրում է Ведомости թերթը` հղում անելով քրեական գործի վերանայման նախնական իրավական գնահատականների վրա:
Միևնույն ժամանակ Interfax գործակալությունը, հղում անելով նախագահական խորհրդի անդամ, մոսկովյան Հելսինկյան խմբի ղեկավար Լյուդմիլա Ալեքսեևային, հայտնում է, որ Մագնիտսկու գործով անկախ փորձաքննությունը դեռ չի ավարտվել, սակայն աշխատանքները կավարտվեն մոտ ժամանակներում:
Հնարավոր է՝ դրա արդյունքները հայտնի լինեն մայիսին: «Մագնիտկու հանդեպ մեղադրանքը սարքվել է ՆԳՆ և ԱԴԾ աշխատակիցների կողմից»,- ցիտում է թերթը: Հաշվետվության մեջ մատնանշվում է, որ մեղադրանքներն անհիմն են եղել, ինչպես նաև մանրամասնում է, որ ընկերությունները, որոնք եղել են Մագնիտսկու հաճախորդները, հարկային որևէ խնդիր չեն ունեցել: Ինքը` իրավաբանը, ընկերություններում տնօրենի կամ հաշվապահի պաշտոն չէր զբաղեցնում և չէր համարվում այդ ընկերությունների հիմնադիրը:
Փաստաթղթի հեղինակները չեն բացառում, որ Մագնիտսկու գործով քննիչների մոտ կարող էին լինել անձնական դրդապատճառներ, քանի որ քննության մեջ ներգրավված են եղել այն քննիչները, որոնք ավելի վաղ նրա կողմից մեղադրվել են կոռուպցիոն հանցագործությունների մեջ (մասնավորապես Hermitage Capital հիմնադրամից գողություն կատարելու մեջ):
Սերգեյ Մագնիտսկին մոտավորապես մեկ տարի անց է կացրել բանտում` հարկերը չվճարելու համար մեղադրանքով քննությունն իրականացնող մարմնի միջնորդությամբ: 2009 թ. նա մահացել է ՔԿՀ-ում: Քննչական կոմիտեի ներկայացուցիչների հայտարարության համաձայն` իրավաբանի մահվան քննությունը դեռևս ավարտված չէ: Մագնիտսկու իրավաբանները պնդում են, որ նրան ժամանակին բժշկական օգնություն ցույց չի տրվել: Մագնիտսկու մահվանից հետո օրենք է ընդունվել, ըստ որի՝ իրավունք է տրվում ազատել մեղադրյալին կամ կասկածյալին, եթե նրա մոտ հայտնաբերվել է ծանր հիվանդություն:
2010 թ. վերջում հայտնի է դարձել, որ նախագահին կից մարդու իրավունքների խորհրդի մասնագետները գնահատական են տալու նաև Միխայիլ Խոդորկովսկու և Պլատոն Լեբեդևի գործին, որոնք մեղադրվում են դրամական միջոցների յուրացման և լվացման մեջ:
