Հազարավոր հարավաֆրիկացի ուսանողներ, որոնք ուրբաթ դուրս են եկել փողոցներ՝ ի նշան բողոքի ուսման վարձավճարները բարձրացնելու կառավարության ծրագրերի դեմ, Պրետորիայում հասել են կառավարական շենքերի համալիրին, որտեղ գտնվում է նախագահի վարչակազմը: Այս մասին հայտնում է BBC-ի ռուսական ծառայությունը:
Այժմ ուսանողների խումբը բողոքի ակցիա է անում համալիրի մուտքի մոտ՝ ոստիկանության հետ բախումների մեջ մտնելով: Լրատվական գործակալությունները հայտնում են, որ ցուցարարները մի քանի անգամ փորձել են տապալել շենքը շրջապատող մետաղական դարպասը:
Ուսանողների երթը սկսվել է ուրբաթ առավոտյան: Նույն օրը ծրագրված է նրանց հանդիպումը նախագահ Ջեյկոբ Զումայի և մի շարք համալսարանների դեկանների հետ:
Բողոքի պատճառը բուհերում ուսման վարձը թանկացնելու կառավարության ծրագրերն են: Ուսանողական շարժման առաջնորդները պնդում են, որ վարձավճարի բարձրացումը խորացնում է սոցիալական անհավասարությունը երկրում, որտեղ սպիտակամորթ ընտանիքները, պաշտոնական վիճակագրության համաձայն, 6 անգամ ավելի են վաստակում սևամորթներից: Ըստ ուսանողների՝ այդ քայլը շատ երիտասարդների կարող է զրկել բարձրագույն կրթություն ստանալու հնարավորությունից: