«Առաջին լրատվական»-ի զրուցակիցն է ԱԺ նախագահ Գալուստ Սահակյանը:
– Պարոն Սահակյան, ՀՅԴ-ն մտադիր է առանձին իրականացնել սահմանադրական հանրաքվեի «այո»-ի քարոզչությունը: Ինչո՞վ է ՀՅԴ-ի «այո»-ն տարբերվում ձեր «այո»-ից, որի պատճառով նրանք ուզում են իրենց քարոզարշավն առանձին անցկացնել:
– Ռազմավարություն է: Ամեն կուսակցություն իր ռազմավարությունն ունի՝ մեկը անհատական, մյուսը՝ խմբակային: Նրանք անընդհատ պայքարել են խորհրդարանական կառավարման մոդելի համար, մինչդեռ իրողությունն այն է, որ մենք այս պահին ենք ընդունել այդ մոտեցումը՝ սկզբում եղել է նախագահական, հետ կիսանախագահական, և հիմա նոր անցում խորհրդարանականին: Առավել ևս՝ ասեմ, որ կիսանախագահական կառավարման մոդելի ժամանակ Դաշնակցությունը նորից պնդում էր խորհրդարանական կառավարման ձևի առավելությունը: Այսինքն՝ մեր քարոզչության հիմնական իմաստը այն է՝ ինչո՞ւ այսպես, հենց հիմա, սա կապված է քաղաքական զարգացումների և քաղաքական կուսակցությունների ներկայացրած պահանջարկի հետ:
– Գուցե ՀՅԴ անդամները չե՞ն ցանկանում ձեր կողքին նույն հարթակում կանգնել, որ իրենց վարկանիշը չընկնի: Չնայած խոսվում է, որ դուք պատրաստվում եք կոալիցիա ձևավորել:
– Մեր և Դաշնակցության միջև դաշինք չկա՝ Դաշնակցությունը ընդդիմություն է, մենք իշխանություն ենք, մեր համագործակցությունն այս պահին միայն Սահմանադրության հետ է կապված: Կոալիցիայի հնարավորությունները որոշակի կդառնան հանրաքվեից հետո, ավելի հստակ կլինեն մոտեցումները խորհրդարանական ընտրություններից հետո: Եթե խոսքը կոալիցիաների մասին է, այդ դիրքորոշումը, այդ մոտեցումները ձևավորվել են ՀՀԿ-ում, որովհետև, դուք էլ գիտեք, որ 50+1-ի և նույնիսկ ավելիի դեպքում ՀՀԿ-ն միշտ էլ ցանկանում է քաղաքական ուժերի հետ համագործակցված ճանապարհ անցնել:
– Ինչպե՞ս եք վերաբերվում Ռուսաստանի հայերի միության նախագահ Արա Աբրահամյանի հայտարարությանը կուսակցություն ստեղծելու և երկրի քաղաքական կյանքին մասնակցելու վերաբերյալ:
– Ինչ վատ է, ինչքան շատ քաղաքական թիմեր լինեն, վերլուծականներ, ինչքան շատ պայքար, կարծում եմ՝ բարեփոխումների առումով, դիրքորոշումները ավելի հստակ կլինեն:
– Ձեզ չի՞ մտահոգում այն փաստը, որ ՀՀԿ-ի կառավարման արդյունքում երկիրը հայտնվել է մի վիճակում, որ օտարերկրացին է ցանկանում օգնել այս վիճակը հաղթահարելուն:
– Ցանկացած հայ օտարերկյա չէ: Եթե խոսքը Արա Աբրահամյանին է վերաբերում, ապա եթե նա Հայաստանի հինգ տարվա քաղաքացիություն ունի, կարող է գալ և մասնակցել մեր ընտրություններին:
– Բայց Արա Աբրահամյանը նաև Ռուսաստանի քաղաքացի է:
– Չգիտեմ, եթե Հայաստանի քաղաքացի չէ, բնականաբար օրենքը թույլ չի տա:
– ՀԱԿ խմբակցության ղեկավար Լևոն Զուրաբյանը մեղադրել է ՍԴ նախագահ սահմանադրական բարեփոխումների հանձնաժողովի նախագահ Գագիկ Հարությունյանին ԵԽԽՎ Վենետիկի հանձնաժողովի նախագահին կաշառելու համար: Որպես խորհրդարանի ղեկավար ինչպե՞ս եք վերաբերվում պատգամավորի հայտարարությանը և դրա արդյունքում հարուցված քրեական գործին:
– Գիտեք, դրանք անիմաստ խոսակցություններ են: Դրա տակ որևէ բան որոնել չարժե: Վենետիկի հանձնաժողովը միակ կառույցն է, որտեղ սահմանադրագետներ են, և ամբողջ աշխարհն այդ կառույցից է օգտվում: Այդ կառույցն իջեցնել ԺԷԿ-ի մակարդակի, բնութագիրն է մի մարդու, ով արտաբերում է նման անհեթեթ խոսակցություններ և փորձում դրանով ուշադրություն գրավել: Եթե ասում է՝ փաստեր ունի, ուրեմն պետք է ներկայացնի: Եթե ոչ, իհարկե քրեական պատասխանատվության կենթարկվի: Իհարկե, ես դրա կողմնակիցը չեմ, որ քրեական պատասխանատվության ենթարկեն, որովհետև մշտապես ասել եմ և պատկերացնում եմ, թե նման դեպքում ոչնչությունը ինչ կդառնա: Դրա համար պիտի հանգիստ թողնես:
– Այնուամենայնիվ, եթե քրեական գործ հարուցելու համար անհրաժեշտ լինի խորհրդարանի համաձայնությունը, Դուք ինչպե՞ս կքվեարկեք Զուրաբյանին անձեռնմխելիությունից զրկելու հարցի քվեարկության ժամանակ:
– Կողմնակից չեմ նման բաների: Չեմ էլ մտածում այդ մասին: Քրեական գործը պիտի հիմքեր ունենա, մոտեցումները ձևավորի: Եթե ինքը նման պնդման համար հիմքեր ունի, պիտի ներկայացնի: Կամ թող ասի, ես դա քաղաքական հայտարարությունների տեսքով եմ արել, և իմ ասածը հաստատող փաստեր չունեմ:
