Երեկ կայացան Իսպանիայի առաջնության 33-րդ տուրի կենտրոնական հանդիպումները: «Բարսելոնա»-ն սեփական հարկի տակ հերթական 3 միավորը վաստակեց, իսկ «Ռեալ»-ը «Մեստալիա»-ում ջախջախեց «Վալենսիա»-ին:
«Բարսա»-ն` «Օսասունա»-ի կողմից չհանդիպելով լուրջ դիմադրության, առանց մեծ ճիգեր գործադրելու հաղթանակ տոնեց 2:0 հաշվով: 24-րդ րոպեին Վիլյան բացեց խաղի հաշիվը: Այս գոլը շատ կարևոր էր ոչ միայն թիմի, այլև հենց ֆուտբոլիստի համար, ով մի քանի ամիս չէր կարողանում դառնալ գոլի հեղինակ: Իսկ 88-րդ րոպեին Մեսսին դրեց հանդիպման վերջակետը:
Եթե «Բարսելոնա»-ի հեշտ հաղթանակը կանխատեսելի էր, ապա դժվար թե մեկը կասկածեր, որ «Վալենսիա»-ն «Մեստալիա»-ում արժանի պայքար կցուցադրի, երկրորդ կազմով խաղացող, «Ռեալ»-ին: Գավաթի եզրափակիչ հանդիպման հիմնական կազմից միայն Կարվալիոն ու Կասիլիասն էին մասնակցում այս հանդիպմանը, սակայն դա չխանգարեց մադրիդցիներին ջախջախիչ հաղթանակ տոնել:
Մոուրինյոյի սաները դեռ առաջին խաղակեսում ապահովեցին հաղթանակը` 4 անպատասխան գնդակ ուղարկելով չղջիկների դարպասը: Բենզեման, Կական և Իգուաինը աչքի ընկան, վերջինը երկու անգամ: Երկրորդ խաղակեսում «արքայական» ակումբը ևս երկու գնդակ խփեց, սակայն սեփական դարպասն ընդունեց երեքը: Իգուաինը խփեց իր երրորդ, Կական` երկրորդ գոլը, «Վալենսիա»-ից աչքի ընկան Սոլդադոն, Յոնասն ու Ալբան: «Վալենսիա»-«Ռեալ»` 3:6:
Այս հաղթանակից հետո «Ռեալ»-ը վաստակեց 80 միավոր և շարունակում է 8 միավորով հետ մնալ առաջատար «Բարսելոնա»-ից: «Վալենսիա»-ն 63 միավորով երրորդն է: