«21-րդ դարում խաղաղ բնակչության վրա կրակ բացելը ոչ այլ ինչ է, եթե ոչ ահաբեկչություն,-լրագրողների հետ հանդիպմանը ասաց ՀՀԿ մամուլի խոսնակ Էդուարդ Շարմազանովը՝ անդրադառնալով հայ-ադրբեջանական սահմանի լարվածությանը և Ադրբեջանի գործողություններին:
ՀՀԿ մամուլի խոսնակը Սարգսյան-Ալիև հնարավոր հանդիպման մասին ասաց, որ Սերժ Սարգսյանը մասնակցելու է ՄԱԿ գագաթաժողովին, բայց այդ հանդիման մասին հայկական կողմը որևէ տեղեկություն չունի:
Ըստ Շարմազանովի՝ ազատամարտիկ Սմբատ Հակոբյանի ծեծի պատճառները քաղաքական չեն:
Սահմանադրական փոփոխությունների հետ կապված քաղաքական պայքարի վերաբերյալ Շարմազանովն ասաց. «Մենք քաղաքական բազմակարծության կողմնակից ենք, երբեք նման ակնկալիք չենք ունեցել, որ բոլորը պետք է «այո» ասեն սահմանադրական բարեփոխումներին; Ամեն ինչ կլինի այնպես, ինչպես կորոշեն ՀՀ քաղաքացիները:
Առաջին նախագահի հոդվածների ընտրանին էի ընթերցում, 95թ. հանրաքվեից առաջ իր հոդվածում նա նշում է, որ «անընդունելի է սահմանադրական փոփոխությունները վերածել իշխանական պայքարի, իշխանությունը պետք է ձևավորվի միայն ու միայն ընտրությունների միջոցով»: Ես համամիտ եմ, որ անընդունելի է և ծիծաղելի է»:
Եվ անդրադառնալով առաջին նախագահ Լևոն Տեր-Պետրոսյանի հայտարարությանը՝ Է. Շարմազանովը նշեց. «Նա իր հարցազրույցում ընդունեց իր քաղաքական թիմի ֆիասկոն, տարիներ առաջ, երբ որ ձևավորեց ՀԱԿ խմբակցությունը, այն 7 հոգանոց էր, բայց հիմա ընդամենը 4-ի անունն է տալիս. երեքն արդեն իր հետ չեն. իսկ դա նշանակում է ֆիասկո»:
