Այսօր Կենտրոն և մի քանի այլ վարչական շրջաններում ջրամատակարարում չի իրականացվում ինչի պատճառով Երևանի պետական համալսարանի որոշ ֆակուլտետներում դասապրոցես չի իրականացվել։ Իսկ Էրեբունի վարչական շրջանի հիվանդանոցում հետաձգվել են բոլոր վիրահատությունները։
«Երևան ջուր» ընկերության լրատվական վարչության պատասխանատու Մուրադ Սարգսյանն «Առաջին լրատվական»-ի հետ զրույցում ասաց, որ այդ երկու վարչական շրջանների ջրամատակարարման ընդհատումը կապ չունի մեկը մյուսի հետ։ ԵՊՀ-ի ջրամատակարարումը դադարեցվել է այսօր Սայաթ-Նովա- Խանջյան խաչմերուկում տեղի ունեցած վթարի պատճառով, սակայն, մեր զրուցակցի խոսքով՝ երեկոյան արդեն վթարը վերացվել է, և ջրամատակարարումը վերսկսվել է։
Ինչ վերաբերում է Էրեբունի վարչական շրջանին և հարակից այլ վարչական շրջաններին, ապա խոսնակի խոսքով, իրենք դեռևս սեպտեմբերի 18-ին են տեղեկացրել, որ Գառնի-Երևան ջրատարի վնասման պատճառով սեպտեմբերի 22-23-ը ջուր չի լինելու։ «Մեծ վթար է եղել, և մենք նախապես էինք ծանուցել դրա մասին»,- ասաց Սարգսյանը՝ հավելելով, որ անկախ ամեն ինչից իրենք ոչ մի բողոք ոչ մի հիմնարկից ու ընկերությունից չեն ստացել։
«Ամեն ինչ կարգին է, մենք աշխատում ենք շատ արագ վերացնել վթարները և հնարավորինս քիչ անհարմարություն պատճառել մեր սպառողներին»,- ասաց Սարգսյանը։ Իսկ թե հիվանդանոցներում վիրահատությունների հետաձգման պատճառով ինչ հետևանքներ կարող են առաջանալ, միայն կարելի է պատկերացնել։