Ուրմիա լճի փրկության համար առաջարկվել է վերականգնման ծրագիր, ըստ որի՝ Իրանը նավթի ու գազի առևտուր կիրականացնի Հայաստանի ու Վրաստանի հետ ջրի ներմուծման դիմաց։ Այս մասին հայտնել է իրանցի խորհրդարանականը՝ փոխանցում է Mehr գործակալությունը։
«Իրանը ջուր կներկրի Հայաստանից ու Վրաստանից՝ նավթի ու գազի փոխանակման դիմաց»,- ասել է Ալի Ալիլուն։
Նրա խոսքով՝ Սևանա լիճն ու Քուռ գետը ջրային ռեսուրսներ են, որոնք Ուրմիան կապահովեն ջրով։
Ուրմիա լճի վերակենդանացման կոմիտեի ներկայացուցչի խոսքով՝ ծրագիրը դեռևս բերված չէ վերջնական տեսքի, քանի որ այն դեռևս հակառակորդներ ունի։
Նշվում է, որ դիտարկվում է նաև Թուրքիայից՝ Վանա լճից ջրամատակարարման տարբերակը։
Ուրմիա լիճը, որը ժամանակին եղել է ամենամեծ լիճը Մերձավոր Արևելքում և մեծությամբ 6-րդ աղի լիճը Երկրի վրա՝ մոտ 5200 քառակուսի կմ մակերեսով, ցամաքում է։
Լճի մակարդակը վերջին 13 տարիներին նվազել է 6 մետրով և կորցրել ջրի 85 տոկոսը, ինչը նշանակում է, որ լիճն անհետացման եզրին է։
