Պաշտոնաթող դատավոր Միր Հազար Խան Խոսոն Պակիստանի Կենտրոնական ընտրական հանձնաժողովի որոշմամբ նշանակվել է երկրի անցումային կառավարության ղեկավար: Այս մասին հայտնում է ITAR-TASS-ը:
Որոշումը կայացվել է այն բանից հետո, երբ իշխող Պակիստանյան ժողովրդական կուսակցության և այլ առաջատար քաղաքական կուսակցությունների ու շարժումների ներկայացուցիչները չեն կարողացել համաձայնության գալ անցումային կառավարության ղեկավարի թեկնածության հարցում:
Այս տարվա մայիսին Պակիստանում պետք է տեղի ունենան համընդհանուր ընտրություններ: Մինչ ընտրությունների անցկացումը՝ հանրապետությունում կգործի անցումային կառավարությունը, որն էլ կզբաղվի դրանց նախապատրաստմամբ:
Երկրի Սահմանադրության համաձայն՝ խորհրդարանական ընտրությունները պետք է անցկացվեն կառավարության լուծարումից 60 օրվա ընթացքում: Այդ ժամկետում քաղաքական գործիչներն այդպես էլ չկարողացան ժամանակավոր կառավարության ստեղծման հարցում պայմանավորվածություն ձեռք բերել: Ընտրությունները կանցկացվեն երկրով մեկ՝ բազմաթիվ ահաբեկչությունների, թալիբների դեմ շարունակվող ռազմական գործողությունների և Հնդկաստանի հետ հարաբերությունների սրման ֆոնին:
Արձակված կառավարությունը ձևավորվել էր 2008 թվականին՝ նախագահ Պերվես Մուշայրաֆի հեռանալուց հետո:
