Հռոմի պապ Ֆրանցիսկոսը չորեքշաբթի Վատիկանի Սուրբ Պետրոսի հրապարակում իր պապության ընթացքում 100-րդ համընդհանուր ունկնդրությունն է տվել: Այս մասին հայտնում է RIA Novosti-ն:
Պապական տան պրեֆեկտուրայի տվյալներով՝ պապի հետ ավանդական ամենշաբաթյա հանդիպմանը մասնակցել է մոտ 10 000 հավատացյալ, որոնց մեջ շատ ուխտավորներ են եղել տարբեր երկրներից: Հռոմում հուլիս-օգոստոսին անոմալ շոգի հետ կապված կարճ դադարից հետո ունկնդրությունը նորից բաց երկնքի տակ է անցկացվել: Բուռն ծափերի ներքո Ֆրանցիսկոսը «պապամոբիլով» անցել է Հռոմեա-կաթոլիկ եկեղեցու գլխավոր տաճարի դիմացի ամբողջ հրապարակով՝ օրհնելով ներկաներին:
Դիմելով հավատացյալներին՝ պապը նրանց կոչ է արել ակտիվորեն մասնակցել Աստծո արարչագործության պահպանման մասին Աղոթքի համաշխարհային օրվան, որն առաջին անգամ Հռոմեա-կաթոլիկ եկեղեցին կնշի սեպտեմբերի 1-ին:
«Մեր ուղղափառ եղբայրների և բարի կամքի բոլոր մարդկանց հետ համատեղ աղոթքում մենք ուզում ենք մեր ներդրումն ունենալ էկոլոգիական ճգնաժամի հաղթահարման գործում, որն ապրում է մարդկությունը»,- նշել է Ֆրանցիսկոս պապը:
